கிழக்கு ஆப்பிரிக்காவில் கடும் வறட்சி: 1 கோடி மக்கள் உயிருக்கு போராட்டம்.

by **ஜிப்ரியா** Sun 10 Jul 2011 - 8:52

கடந்த 60 ஆண்டுகளில் இல்லாத வகையில் கிழக்கு ஆப்பிரிக்காவில் கடுமையான வறட்சி ஏற்பட்டு உள்ளது. இந்த நிலையில் 1 கோடி மக்கள் போதிய உணவு கிடைக்காமல் உயிருக்கு போராடி வருகிறார்கள்.வறட்சியின் காரணமாக உணவு தட்டுப்பாடு ஏற்பட்டு எத்தியோப்பியா, கென்யா, திபோதி மற்றும் சோமாலியா ஆகிய நாடுகளில் ஒரு வேளை உணவு கூட கிடைக்காமல் மக்கள் கண்ணீர் விடுகின்றனர். அவர்கள் உயிர் பிழைக்க அருகாமை நாடுகளுக்கு தப்பி வருகிறார்கள்.
ஐக்கிய நாடுகள் சபை,"ஆயிரக்கணக்கான சோமாலியர்கள் தங்கள் நாட்டை விட்டு வெளியேறி வருவதாக தெரிவித்தது".கென்யாவில் உள்ள தாதப் பகுதியல் உலகின் மிகப்பெரிய அகதிகள் முகாம் உள்ளது. அங்கு 90 ஆயிரம் பேர் தங்க வசதி உள்ளது. ஆனால் 3 லட்சத்து 80 ஆயிரம் பேர் அந்த இடத்தில் குவிந்து இருப்பதாகவும் ஐ.நா குறிப்பிட்டு உள்ளது.
மழை உரிய நேரத்தில் பெய்யாததால் உணவுப்பொருள்கள் விலை கடுமையாக அதிகரித்து உள்ளது. இதனால் பிராந்திய மோதல்களும் ஏற்பட்டு உள்ளன என்று குழந்தைகள் மேம்பாட்டு அமைப்பின் ஒருங்கிணைப்பாளர் டொக்டர் உன்னி கிருஷ்ணன் கூறுகிறார்.கடந்த 10 ஆண்டுகளாக ஹார்ன் ஆப்பரிக்கா பகுதியில் தொடர்ச்சியாக மழை அளவு குறைந்து உள்ளது என ஐ.நா உலக உணவு திட்டம் புள்ளி விவரத்தில் தெரிவிக்கப்பட்டு உள்ளது. தற்போதும் வறட்சி தாண்டவம் நீடிப்பதால் வருகிற அக்டோபர் மாதமும் அறுவடை இருக்காது. எனவே உணவு பற்றாக்குறை மேலும் அதிகமாகும் என எச்சரிக்கப்பட்டு உள்ளது.