தன் ஜோடியை தேடி ஆறு முறை நகருக்குள் ஓடி வந்த கரடி

தன் ஜோடியை தேடி நகருக்குள் வந்த கரடியை வன உயிரின அதிகாரிகள் மயக்க ஊசி போட்டு பிடித்தனர். அந்தக் கரடியை வலையில் பத்திரமாக பிடித்து காட்டிற்குள் விட்டனர்.

அமெரிக்காவின் நியூஜொ்சி ஈஸ்ட் பிரான்ஸ் விக் பகுதியில் மரத்தின் மேல் கரடி ஏறிக் கொண்டு அதிகாரிகளுக்கு கண்ணாமூச்சி காட்டியது. இந்த ஆண் கரடி ஏற்கனவே கடந்த ஆண்டு 6 முறை காட்டில் இருந்து தப்பி ஓடிவந்து உள்ளது.

ஒவ்வொரு முறையும் இந்த கரடி அரசு வன உயிரின பூங்கா பகுதிக்குள் பத்திரமாக கொண்டு விடப்பட்டு உள்ளது. கரடியை பிடித்த குழுவில் இருந்த வன உயிரின நிபுணர் கிம் டினேஸ் கூறுகையில்,"காட்டில் இருந்து தப்பி ஓடி வந்த கரடி இந்த முறை 100 மைல் நடந்து வந்துள்ளது" என்றார்.

பல மணிநேரம் சாலைப் பகுதியிலேயே ஆண் கரடி நடந்து வந்ததால் அதன் உடல் எடை குறைந்து உள்ளது. கரடி பல மைல் நடந்து வந்ததில் 30 பவுண்ட் எடை குறைந்து உள்ளது.

நியூஜெர்சி பிராந்தியத்தில் அதிக பெண் கரடிகள் உள்ளன. வயது குறைந்த இந்த கரடி பெரிய கரடிகளுடன் சண்டை போட முடியாமல் நாடோடி போல பல மைல் கணக்கில் நடந்து களைத்து போய் இருக்கிறது. இனிமேல் நடக்க முடியாது என்ற நிலையில் மரத்தில் ஏறியது.

இதனை அதிகாரிகள் மயக்க ஊசி போட்டு பிடித்து விட்டார்கள். பிடிபட்ட ஆண் கரடி மீண்டும் காட்டில் இருந்து தப்பி வேறு பகுதியில் நடக்க ஆரம்பிக்கலாம்.