ஊட்டியில் உறைபனி; சுற்றுலா பயணிகள் அவதி

ஊட்டியில், பள்ளத்தாக்கு பகுதிகளின் வெப்பநிலை, பூஜ்ஜியத்துக்கும் கீழே சென்று விட்டது. அதிகாலை வேளைகளில், புல்வெளி பகுதிகள் அனைத்தும், வெள்ளை கம்பளம் போர்த்தியது போன்று, உறைபனி படர்ந்து காணப்படுகின்றன. ஊட்டியில் இந்த ஆண்டு பருவமழை எதிர்பார்த்த அளவுக்கு பொழியவில்லை. அவ்வப்போது, புயல் சின்னம் காரணமாக மழை பெய்தது. இந்நிலையில், நவம்பர் மாதம் துவங்க வேண்டிய பனிக்காலமும் மழை பாதிப்பால் தாமதப்பட்டது. டிசம்பர் முதல் வாரம் நீர் பனியின் தாக்கம் ஊட்டியில் தென்பட்டது. குறைந்தபட்ச வெப்பநிலை 8 டிகிரி செல்சியஸ் ஆகவும், அதிகபட்ச வெப்பநிலை 22 டிகிரி செல்சியஸ் ஆகவும் இருந்தது. இந்நிலையில், கடந்த இரு நாட்களாக பனியின் தாக்கம் அதிகரித்து காணப்படுகிறது. ஊட்டியில் நேற்று காலை வெப்பநிலையில் பெரும் மாற்றம் ஏற்பட்டு, பூஜ்யம் டிகிரி செல்சியசுக்கும் கீழே சென்று விட்டது. ஊட்டியின் பல இடங்களில், வெள்ளை கம்பளம் போர்த்தியது போல உறைபனி படர்ந்திருந்தது. பள்ளத்தாக்கு பகுதிகளான வேலிவியூ, முக்கூர்த்தி, அவலாஞ்சி, பார்சன்ஸ் வேலி, தலைகுந்தா, காந்தல் ஆகிய பகுதிகளில் பகல் வேளைகளிலும் உறைபனி காணப்பட்டது. இந்த பகுதிகளில் குறைந்த பட்ச வெப்பநிலையே, பூஜ்ஜியத்துக்கும் கீழே, "மைனஸ்' டிகிரி செல்சியஸ் அளவுக்கு குறைந்துள்ளது. நகரப்பகுதிகளில் குறைந்தபட்ச வெப்பநிலை 5 டிகிரி செல்சியசாகவும், அதிகபட்ச வெப்பநிலை 19 டிகிரி செல்சியசாகவும் இருந்தது. முற்பகல் 11.00 மணி வரை குளிர் குறையாமல் இருப்பதால், சுற்றுலா பயணிகளும், மாணவ, மாணவியரும் கடும் அவதிப்படுகின்றனர்.

8)