தி.மு.க., அரசுக்கு அனைவரும் ஆதரவு கரம் நீட்டுவர் - கருணாநிதி

"வேலை காலி இல்லை என விரட்டும் பலகைகளுக்கு இனி எங்கும் இடம் இல்லை.
இந்த நிலையை உருவாக்க இந்த அரசு தொடர்ந்து பாடுபட அனைவரும் ஆதரவுக்கரம்
நீட்டுவர்' என, முதல்வர் கூறியுள்ளார்.
அவரது அறிக்கை: கடந்த அ.தி.மு.க., ஆட்சியில் அரசு அலுவலர்களும்,
ஆசிரியர்களும் தங்களது உரிமையைக் கேட்ட காரணத்தால், ஒரே நாளில் பணி நீக்கம்
செய்யப்பட்ட அதிர்ச்சியில் இறந்த துயரமான சம்பவங்கள் நடைபெற்றதுண்டு.
ஆனால், 2006ல் தி.மு.க., ஆட்சி அமைந்த பின் தேர்தல் அறிக்கையில் அளித்த
வாக்குறுதிப்படி, இதுவரை தமிழகத்தில் நான்கு லட்சத்து 98 ஆயிரத்து 40
பேருக்கு அரசுப் பணி வழங்கப்பட்டுள்ளது. ஐக்கிய நாடுகள் அமைப்பு இந்த ஆண்டை
உலக இளைஞர்கள் ஆண்டு என அறிவித்திருப்பதை ஒட்டி, வேலை வாய்ப்பில்லாத
இளைஞர்களுக்கு வேலை வாய்ப்பு பெறுவதற்கேற்ற பயிற்சிகளைத் தீவிரப்படுத்தும்
நோக்கத்துடன் புதிய திட்டம் இந்த ஆண்டு நடைமுறைப்படுத்தப்பட உள்ளது.
பத்தாம் வகுப்பு மற்றும் பிளஸ் 2 வகுப்பு படித்த இளைஞர்கள்
இன்ஜினியரிங், இளங்கலை, முதுகலை பட்டம் பெற்றுள்ள இளைஞர்களுக்கு
வேலைவாய்ப்புக்கான திறன் வளர்ப்புப் பயிற்சி இத்திட்டத்தில் வழங்கப்படும்.
பயிற்சி பெற்ற இளைஞர்கள் பல்வேறு தொழில் நிறுவனங்களில் உரிய வேலை
வாய்ப்புகளைப் பெற இத்திட்டம் வழி வகுக்கும். நடப்பு ஆண்டில் ஒரு லட்சம்
இளைஞர்களுக்கு பயிற்சி அளித்து வேலைவாய்ப்பை ஏற்படுத்தித் தரவிருக்கும்
இத்திட்டத்தைச் செயல்படுத்த முதல் கட்டமாக 50 கோடி ரூபாய் ஒதுக்கீடு
செய்வதற்கான அரசாணை வெளியிட்டேன்.
அந்த அறிவிப்பின்படி முதல் கட்டமாக திருவாரூர், திருவள்ளூர்,
திருநெல்வேலி, நாகப்பட்டினம், தர்மபுரி, கிருஷ்ணகிரி ஆகிய ஆறு
மாவட்டங்களில் படித்து வேலைவாய்ப்பற்ற இளைஞர்களுக்கு வேலை வாய்ப்பைப்
பெறுவதற்கேற்ற பயிற்சி அளிக்கும் திட்டத்தில் வேலை வாய்ப்பு முகாம்கள்
நடத்தப்பட்டன. அவர்கள் அனைவருக்கும் வேலைக்கான பயிற்சி பெறுவதற்கான நியமன
ஆணைகளை நானே நேரடியாக வழங்கியிருக்கிறேன். எனவே, "வேலை காலி இல்லை' என
விரட்டும் பலகைகளுக்கு, "இனி எங்கும் இடம் இல்லை' என்ற நிலையை உருவாக்க
இந்த அரசு தொடர்ந்து பாடுபட இளைஞர், மகளிர் அனைவரும் ஆதரவுக்கரம் நீட்டுவர்
என்பதில் அணுவளவும் அய்யமில்லை. இவ்வாறு முதல்வர் கருணாநிதி கூறியுள்ளார்.

:”@: :!+: