விவசாயிகள் எதிர்பார்க்கும் விலையை பெற்றுக்கொடுக்க அரசு தீர்மானம்

சிறுபோக நெல் கொள்வனவு:

விவசாயிகள் எதிர்பார்க்கும் விலையை
பெற்றுக்கொடுக்க அரசு தீர்மானம்



அரச அதிபர்களுக்கு போதிய நிதி
தயார் நிலையில் 250 களஞ்சியங்கள்


லோரன்ஸ் செல்வநாயகம்

நாடளாவிய ரீதியில் சிறுபோக நெல் கொள்வனவுக்கான சகல நடவடிக்கைகளையும் அரசாங்கம்
துரிதமாக மேற்கொண்டுள்ளதுடன் விவசாயிகள் எதிர்பார்க்கும் விலையைப்
பெற்றுக்கொடுக்கவும் தீர்மானித்துள்ளதாக அமைச்சர் ஜோன்ஸ்டன் பெர்னாண்டோ தெரிவித்தார்.
நெல் விளைச்சலைக் கருத்திற்கொண்டு அரசாங்க அதிபர்கள் கோரும் போதுமானளவு நிதியை
பெற்றுக்கொடுப்பதற்கு நடவடிக்கை எடுக்கப்பட்டுள்ளதாகவும் கொள்வனவு செய்யப்படும்
நெல்லைக் களஞ்சியப்படுத்த 250 களஞ்சியசாலைகளைத் தயார் நிலையில்
வைக்கத்தீர்மானித்துள்ளதாகவும் அமைச்சர் தெரிவித்தார்.
2011 சிறுபோக நெல் கொள்வனவு சம்பந்தமான சகல முன்னேற்பாட்டு நடவடிக்கைகளையும்
அரசாங்கம் முன்னெடுத்து வருகிறது. அதற்கு முன்னோடியாக நெல் கொள்வனவு தொடர்பில்
எதிர்கொள்ள நேரும் பிரச்சினைகளுக்கு வெற்றிகரமாக முகங்கொடுப்பது சம்பந்தமாக அமைச்சர்
ஜோன்ஸ்டன் பெர்னாண்டோ சம்பந்தப்பட்ட அதிகாரிகளுக்கு வழிகாட்டல்களை வழங்கியுள்ளார்.
இதுவரை காலமும் நெல்கொள்வனவிற்காக அமைக்கப்படும் விசேட கொள்வனவு மத்திய
நிலையத்தினூடாகவே நெல் கொள்வனவு நடவடிக்கைகள் மேற்கொள்ளப்பட்டன. இம்முறை பிரதேச
செயலகப் பிரிவுகள் தோறும் நெல் கொள்வனவு நடவடிக்கைகளை மேற்கொள்ளத்
தீர்மானிக்கப்பட்டுள்ளது.
இதற்கிணங்க பிரதேச செயலகங்கள் மூலம் உரிய பகுதிகளுக்கு லொறிகள் அனுப்பப்பட்டு
அதனூடாக நெல் கொள்வனவு நடவடிக்கைகள் மேற்கொள்ளப்படவுள்ளன. இதற்கான பணிப்புரைகளை நெல்
சந்தைப்படுத்தும் சபையின் அதிகாரிகளுக்கு அமைச்சர் வழங்கியுள்ளார்.
இந்தவகையில் விவசாயிகளையும் நுகர்வோரையும் பாதுகாக்கும் வகையிலேயே அமைச்சின் சகல
செயற்பாடுகளும் அமையும் எனவும் அமைச்சர் தெரிவித்தார்.

:”@: