விசேட பொலிஸ் குழு தீவிர விசாரணை; 17 பேர் சாட்சியம்

குகநாதன் மீதான தாக்குதல்:
விசேட பொலிஸ் குழு தீவிர விசாரணை; 17 பேர் சாட்சியம்
கே. அசோக்குமார்
“உதயன்” பத்திரிகையின் ஊடகவியலாளர் குகநாதன் மீதான தாக்குதல் தொடர்பாக 17 பேரிடமிருந்து சாட்சியங்கள் பதிவு செய்யப்பட்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் பிரிஷாந்த ஜயகொடி நேற்று தெரிவித்தார்.

யாழ். பொலிஸ் அத்தியட்சகர் தலைமையிலான விசேட பொலிஸ் குழுவொன்று தீவிர விசாரணைகளிலும் ஈடுபட்டுள்ளதாக பொலிஸ் ஊடகப் பேச்சாளர் தெரிவித்தார்.

குகநாதன் மீதான தாக்குதல் சம்பவம் தொடர்பாக தகவல் தெரிவிக்க விரும்புவோர் உடனடியாக தொடர்புகொண்டு தகவல்களை தெரிவிக்கலாம் என்றும்

அவர் கேட்டுக் கொண்டார். பொலிஸ் மா அதிபர் இது தொடர்பாக வேண்டுகோள் விடுத்துள்ளதுடன், ஜனாதிபதி அவர்களும் இவ்வாறான வேண்டுகோளை விடுத்துள்ளார் என ஊடகத்துறை அமைச்சர் கெஹெலிய ரம்புக்வெல்லவும் தெரிவித்தார்.

யாழ். பொலிஸ் அத்தியட்சகர் தலைமையிலான விசேட பொலிஸ் குழுவொன்றை பொலிஸ் மா அதிபர் இலங்ககோன் நியமித்துள்ளார் என்றும் பொலிஸ் ஊடகப் பேச்சாளர் பிரிஷாந்த ஜயகொடி தெரிவித்தார்.

குகநாதன் மீதான தாக்குதலுடன் தொடர்புடைய நபர்கள் எவரும் இதுவரை கைது செய்யப்படவில்லை. அதுமட்டுமல்ல ஊடகவியலாளர்கள் தாக்கப்பட்டமை, கொல்லப்பட்டமை, கடத்தப்பட்டமை தொடர்பாக பொலிஸார் எதுவித நடவடிக்கையும் எடுக்கவில்லை என ஊடகவியலாளர் ஒருவர் குற்றம் சாட்டினார். இதற்கு பதிலளிக்கும் வகையில் அமைச்சர் கெஹெலிய பேசும் போது, இவ்வாறு குற்றம் சாட்டுவது தவறு. குகநாதன் விடயத்திலும் பொலிஸார் நடவடிக்கை எடுத்து வருகின்றனர். ஓரிரு தினங்களில் குற்றவாளி யார் என கண்டறிந்துவிட முடியாது.

பொலிஸ் மா அதிபர் இது தொடர்பாக ஜனாதிபதி அவர்களிடம் அறிக்கையொன்றையும் கையளித்துள்ளார் என அமைச்சர் கூறினார்.

இதேவேளை ஜனாதிபதியிடம் கையளித்த அறிக்கையில் குறிப்பிடப்பட்டுள்ள விடயங்கள் என்ன? என்பது பற்றி பொலிஸ் ஊடகப் பேச்சாளர் பிரிஷாந்த ஜயகொடியிடம் கேட்டபோது, அறிக்கையில் உள்ளடக்கப்பட்டுள்ள விடயங்கள் பற்றி இன்னும் வெளியிடப்படவில்லை என்றார்.

:”@: