பள்ளி வாகனங்களில் ஆடு, மாடுகளை போல் மாணவ, மாணவிகளை ஏற்றி செல்கின்றனர்

by **நேசமுடன் ஹாசிம்** Fri 5 Aug 2011 - 16:27

கும்மிடிப்பூண்டி அருகே தேவம்பட்டு கிராமத்தை சேர்ந்தவர் வெங்கடேசன். லாரி டிரைவர்.
இவரது மகன் பிரவீன்ராஜ் (7). அங்குள்ள மகரிஷி வித்தியா மந்திர் மெட்ரிக் பள்ளியில் 2ம் வகுப்பு படித்தான். வேனில் பள்ளிக்கு சென்று வருவது வழக்கம். நேற்று காலை 9 மணிக்கு வேனில் பள்ளிக்கு புறப்பட்டான். டிரைவர் பிரகாஷ் (24) வேனை ஓட்டினார். வேனில் 35க்கு மேற்பட்ட மாணவ & மாணவிகள் இருந்தனர். பிரவீன்ராஜ், வேன் படிக்கட்டில் உட்கார்ந்து இருந்தான்.

தேவம்பட்டு & ரெட்டம்பேடு சாலையில் உள்ள பள்ளத்தில் வேன் திடீரென்று வேகமாக இறங்கி ஏறியது. அப்போது வேன் கதவு தானாக திறந்து, படிக்கட்டில் இருந்த மாணவன் பிரவீன் தவறி கீழே விழுந்தான். அவன் மீது வேன் பின்பக்க டயர் ஏறியது. இதில் தலையில் காயம் அடைந்த பிரவீன்ராஜ், ரத்த வெள்ளத்தில் துடிதுடித்து சம்பவ இடத்திலேயே பரிதாபமாக இறந்தான்.

தகவல் அறிந்ததும் டிஎஸ்பி குமார், தாசில்தார் ராமபிரான், ரெட்டம்பேடு ஊராட்சி தலைவர் முரளி மற்றும் கிராம மக்கள் வந்தனர். மாணவன் சடலத்தை மீட்டு பொன்னேரி அரசு மருத்துவமனைக்கு அனுப்பி வைத்தனர். கும்மிடிப்பூண்டி போலீசார் வழக்கு பதிவு செய்து டிரைவர் பிரகாசை கைது செய்தனர். இதுகுறித்து ஊராட்சி தலைவர் முரளி கூறியதாவது:

பள்ளி வாகனங்களில் ஆடு, மாடுகளை போல் மாணவ & மாணவிகளை ஏற்றி செல்கின்றனர். அதில், கிளீனர் இருப்பதில்லை, வாகனம் சரியான பராமரிப்பும் இல்லை. அனுபவம் இல்லாத டிரைவர்களை குறைந்த சம்பளத்தில் பள்ளி நிர்வாகம் வேலைக்கு அமர்த்துகிறது. அவர்கள் பொறுப்பின்றி வேனை படுவேகமாக ஓட்டி விபத்து ஏற்படுத்துகின்றனர். இதை அதிகாரிகள் கண்காணிக்க தவறி விடுகின்றனர். எனவே, பொறுப்பற்ற பள்ளி நிர்வாகம் மீதும், கண்காணிக்காத போலீஸ் அதிகாரிகள் மீதும் தகுந்த நடவடிக்கை எடுக்க வேண்டும் என்றார்.