நடமாடும் காய்கறி வியாபாரியின் திருகுதாளம் அம்பலமாகியது

கொழும்பு கிராண்ட்பாஸ் பகுதியில் ஒரு தள்ளுவண்டியில் வைத்து காய்கறிகளை விற்பனை செய்யும் ஒரு வர்த்தகரின் காய்கறிகள் அந்தளவுக்கு விலைபோகாவிட்டாலும், அந்த மனிதன் மற்றவர்களை விட அதிக பணம் சம்பாதித்துக் கொண்டிருப்பதை பொலிஸார் உட்பட பலரும் அவதானித்திருக்கிறார்கள்.

இந்த மனிதனை எப்போதும் இளைஞர்களும், இளம் பெண்களும் நாடி வந்து சில நிமிடங்கள் அன்போடு பேசிவிட்டு செல்வார்களே ஒழிய, அவர்கள் காய்கறிகளை வாங்குவதில்லை. பலரின் சந்தேகக் கண் இந்த வியாபாரியின் மீது திரும்பிய போது அந்த மனிதன் தன்னைப் பார்க்க வருபவர்களிடம் பணத்தை பெற்று ஏதோவொரு சிறு பொருளை அவர்களின் கையில் திணித்துவிடுவதை ஓரிருவர் பார்த்திரு க்கிறார்கள். பின்னர், இந்த விடயம் மெதுவாக பொலிஸாரின் காதில் எட்டியது.

இவன் தன்மல்விலவிலிருந்து கஞ்சாவை எடுத்து வந்தும், ஒரு பெரிய போதைவஸ்து வியாபாரியின் சில்லறை வியாபாரியாக செயற்பட்டும் கஞ்சா, போதைவஸ்து போன்றவற்றை அப்பகுதியிலுள்ள சிறிய கடைகளுக்கு மொத்தமாக விற்பனை செய்தும் எஞ்சியவற்றை தான் காய்கறி வியாபாரியாக நடத்திக் கொண்டு, தன்னை பார்க்க வருபவரிடம் விற்றும் பணம் சம்பாதித்து வந்தமை பற்றிய தகவல்கள் இப்போது பொலிஸாருக்கு கிடைத்திருக்கிறது.

போதைவஸ்துக்கு அடிமையாகிய சில இளைஞர்களை விசாரணைக்குட்படுத்திய போதே இந்த உண்மை வெளிப்பட்டதாக ஒரு பொலிஸ் உத்தியோகத்தர் தெரிவித்தார்.

பொலிஸாரின் கவனம் தன் பக்கம் திரும்பியிருக்கிறது என்பதை தெரிந்த அந்தப் போலி காய்கறி வியாபாரி இப்போது தலைமறைவாகிவிட்டான். ஆயினும், விரைவில் அவனை நாம் பிடித்து நீதிமன்றத்தின் மூலம் தண்டனை பெற்றுக்கொடுக்க முடியும் என்ற நம்பிக்கையில் பொலிஸார் அவனை தேடும் பணியை ஆரம்பித்துள்ளார்கள்.

:#.: :#.: