முதலாவது 20க்கு 20 கிரிக்கெட் : இலங்கை - அவுஸ்திரேலியா இன்று பலப்பரீட்சை

முதலாவது 20க்கு 20 கிரிக்கெட் :
இலங்கை - அவுஸ்திரேலியா இன்று பலப்பரீட்சை
இலங்கை - அவுஸ்திரேலியா அணிகள் மோதும் முதலாவது 20க்கு 20 போட்டி இன்று கண்டி பல்லேகல சர்வதேச விளை யாட்டு மைதானத்தில் இடம்பெறுகிறது.

இரு அணிகளும் பலத்த சவால்கள் எதிர்பார்ப்புக்கு மத்தியில் களம் இறங்குகின்றன.

அவுஸ்திரேலிய கிரிக்கெட் அணி இலங்கைக்கு வந்துள்ளது. அந்த அணியில் இளைஞர்கள் அதிகம் இடம்பிடித்துள்ளனர்.

இது குறித்து இலங்கை அணியின் தலைவர் திலகரத்ன டில்ஷான் கூறுகையில்; அவுஸ்திரேலிய அணியில் இளைஞர்கள் இருப்பதால் அவர்களை குறைத்து மதிப்பிட முடியாது என்றார்.

“டுவென்டி 20” போட்டியின் போது லசித் மாலிங்க காயம் அடைந்திருப்பது வருத்தம் அளிப்பதாக தில்ஷான் தெரிவித்தார். இருப்பினும் அந்த பொறுப்பை இளம் வீரர்கள் ஏற்பார்கள் என்றும் நம்பிக்கை தெரிவித்தார்.

ஆகஸ்ட் 10ம் திகதி துவங்கும் 5 ஒருநாள் தொடரில் மாலிங்க இடம்பெறுவார். இதனையடுத்து அவுஸ்திரேலிய அணிக்கு எதிராக 3 டெஸ்ட் போட்டிகள் நடைபெறுகின்றன.

அவுஸ்திரேலிய அணி எப்போதும் கடுமையாக ஆடுவார்கள் என தில்ஷான் தெரிவித்தார். அவுஸ்திரேலிய அணி பலம் குறித்து தெரிவித்தார்.

இலங்கை அணி இந்த ஆண்டு உலகக் கோப்பை போட்டியில் 2வது இடம்பெற்ற அணியாகும்.

இலங்கை அணிக்கு எதிரான “டுவென்டி 20” கிரிக்கெட் தொடர் சவால் நிறைந்ததாக இருக்கும் என அவுஸ்திரேலிய கப்டன் கமரூன் வைட் தெரிவித்துள்ளார்.

இத்தொடர் குறித்து அவுஸ்திரேலிய “டுவென்டி 20” தலைவர் கமரூன் வைட் கூறியதாவது, இலங்கைக்கு எதிரான “டுவென்டி 20” தொடரை மிகுந்த ஆவலுடன் எதிர்நோக்கி உள்ளோம்.

சமீபகாலமாக “டுவென்டி 20” போட்டிகளில் இலங்கை அணி சிறப்பான ஆட்டத்தை வெளிப்படுத்தி வருகிறது. தீவிர இலங்கை அணியை அதன் சொந்த மண்ணில் எதிர்கொள்ள இருப்பதால், இத்தொடர் நிச்சயம் சவால் நிறைந்ததாக இருக்கும் என நம்புகிறேன்.

சமீபத்தில் இங்கிலாந்துக்கு எதிராக இலங்கை அணியினர் சிறப்பான ஆட்டத்தை வெளிப்படுத்தினர் தற்போது நல்ல திறனில் உள்ள இவர்கள் நிச்சயம் நெருக்கடி கொடுப்பார்கள்.

இலங்கைக்கு எதிராக வெற்றி பெற கடுமையான பயிற்சி மேற்கொண்டு வருகிறோம். இங்குள்ள மைதானத்தின் தன்மைக்கேற்ப ஆட்டத்தை வெளிப்படுத்த புதிய திட்டம் வகுத்துள்ளோம். எனவே இலங்கை அணியை எளிதாக சமாளித்து வெற்றிபெற முயற்சிப்போம் என்று தெரிவித்தார்.