ஸ்பெக்ட்ரம் ஊழலுக்கு பிரதமர் மன்மோகன்சிங் பொறுப்பாக முடியாது;

by **நண்பன்** Mon 8 Aug 2011 - 4:18

ஸ்பெக்ட்ரம் ஊழலுக்கு பிரதமர் மன்மோகன்சிங் பொறுப்பாக முடியாது; திட்டக்கமிஷன் துணைத்தலைவர் கருத்து

புதுடெல்லி, ஆக.8-

2ஜி ஸ்பெக்ட்ரம் ஊழல் குற்றச்சாட்டு தொடர்பான விசாரணை டெல்லி சி.பி.ஐ. சிறப்பு கோர்ட்டில் நடைபெற்று வருகிறது. விசாரணையில் ஆஜராகி வாதாடிய முன்னாள் மத்திய மந்திரி ஆ.ராசா, `2ஜி ஸ்பெக்ட்ரம் அலைவரிசை ஒதுக்கீடு செய்ததில் அனைத்து விவரங்களும் பிரதமர் மன்மோகன்சிங்குக்கு தெரியும் என்றும் அவருக்கு கடிதம் எழுதியதாகவும்' தெரிவித்தார். உள்துறை மந்திரி ப.சிதம்பரம் மீதும் குற்றஞ்சாட்டினார்.

இதனால், பிரதமர் மன்மோகன்சிங் மற்றும் ப.சிதம்பரம் மீது எதிர்க்கட்சிகள் புகார் கூறி வருகின்றன. இந்த நிலையில், தனியார் ஆங்கில செய்தி சேனலுக்கு பேட்டியளித்த மத்திய திட்டக்கமிஷன் துணைத்தலைவர் மாண்டேக் சிங் அலுவாலியாவிடம் இதுகுறித்து கேள்வி எழுப்பப்பட்டது.

அதற்கு பதிலளித்து அவர் கூறியதாவது:-

மத்திய மந்திரி சபையில் இடம் பெற்றுள்ள தனது சகாக்கள் (மத்திய மந்திரிகள்) ஒவ்வொருவருடைய நடவடிக்கைகளையும் கண்காணிக்கும் சூப்பர் மந்திரியாக பிரதமர் செயல்பட வேண்டும் என நான் கருதவில்லை. ஸ்பெக்ட்ரம் ஒதுக்கீட்டில் நியாயமும் வெளிப்படை தன்மையும் பின்பற்றப்பட வேண்டும் என 2007-ம் ஆண்டு நவம்பர் 2-ந் தேதி அன்று பிரதமர் கடிதம் எழுதியுள்ளார்.

மேலும், ஒதுக்கீடு தொடர்பாக தொலைத்தொடர்பு ஒழுங்குமுறை ஆணைய விதிகளை பின்பற்ற வேண்டும் என்றும் அவசியம் ஏற்பட்டால் மத்திய அரசின் சொலிசிட்டர் ஜெனரல் அனுமதியை பெற வேண்டும் என்றும் தொலைத் தொடர்பு மந்திரியாக இருந்த ஆ.ராசாவை பிரதமர் கேட்டுக்கொண்டார்.

அந்த கடிதத்துக்கு பதில் அனுப்பிய அந்த மந்திரி (ஆ.ராசா), நிலுவையில் உள்ள தொலைத் தொடர்பு கொள்கையை பின்பற்றியே ஒதுக்கீடு நடைபெறுகிறது என்று தெரிவித்துள்ளார். தற்போதைய நிலையில், ஒரு அமைச்சகத்தால் தவறு நடந்தால் பாதிக்கப்பட்ட மக்கள் கோர்ட்டுக்கு செல்வார்கள் அல்லது போராட்டம் நடத்துவார்கள். ஒருவேளை, ஒவ்வொரு அசைவையும் பிரதமர் கண்காணித்தால் அது மந்திரிசபை அரசாக இருக்காது. ஒவ்வொரு முடிவு எடுப்பதற்கு முன்பும், நுண்ணிய நிர்வாகத்தை பிரதமர் செய்ய முடியாது.

2ஜி விவகாரத்தில் தவறான முறையில் கையாளப்பட்டுள்ளது. பிரதமர் அலுவலகம் மட்டத்தில் தவறாக கையாளப்பட்டிருக்கிறது. ஒட்டு மொத்த அரசு நிர்வாகமும் தன்னுடைய ஒவ்வொரு வேலையையும் மிகச்சரியானது தானா? என சரிபார்க்க முடியாது. தற்போதும், தவறுகள் நடைபெறுவதாக பிரதமருக்கு நூற்றுக்கணக்கான கடிதங்கள் வருகின்றன. ஒவ்வொரு கடிதத்துக்கும் பிரதமரே தனிப்பட்ட முறையில் பொறுப்பெடுத்து செயல்படுவது என்பது நடக்காத காரியம்.

இவ்வாறு மாண்டேக் சிங் அலுவாலியா தெரிவித்தார்.