சிறைத்தண்டனையை விட வேறு எதுவும் இந்த மனிதனை திருத்திவிடுமா?

சிறைத்தண்டனையை விட வேறு எதுவும் இந்த மனிதனை திருத்திவிடுமா?
அடி உதவுவது போல் அண்ணன் தம்பி உதவமாட்டார்கள் என்ற பெரியோர்களின் கூற்று, இந்த மனிதனை பொருத்தமட்டில் உண்மையாகிவிட்டது. தன்னுடைய மனைவியை அடிக்கடி அடித்து துன்புறுத்தி காயப்படுத்தும் இந்த கணவனை திருத்துவதற்கு சிறைத்தண்டனையை விட வேறு எதுவுமே உதவப் போவதில்லை.

தனது மனைவியை அடித்து அவளது முகத்தை காயப்படுத்திய ஒரு கணவன் பொலிஸாரால் நீதிமன்றத்தில் நிறுத்தப்பட்ட போது, வேறு வழியின்றி தான் செய்த குற்றத்தை ஒப்புக் கொண்டுள்ளார்.

அதையடுத்து, கொழும்பு கோட்டை நீதவான் செல்வி லங்கா ஜெயரட்ன அந்த மனிதனுக்கு இரண்டரை ஆண்டு கடுங்காவல் சிறைத்தண்டனை வித்தித்தார். இந்த மனிதன் மிகவும் கொடியவன். ஒரு கூர்மையான பிளேடை பயன்படுத்தி, இவன் தனது மனைவியின் முகத்தில் பல இடங்களை வெட்டி, அவளை படுகாயப்படுத்தியுள்ளான். இதுபற்றி அந்தப் பெண் அளித்த புகாரை அடுத்து, பொலிஸார் அவனை கைது செய்து, நீதிமன்றத்தில் நிறுத்தினார்கள்.

இவன் தன் மனைவியை இவ்விதம் பல தடவை அடித்தும், வெட்டியும் துன்புறுத்தியிருக்கிறான். நீதிமன்றத்தில் நிறுத்தப்பட்ட போது அந்த மனிதனின் சார்பில் வாதாடிய சட்டத்தரணி தர்ஷினி குணரட்ன, சந்தேகநபர் எல்லா குற்றச்சாட்டுக்களையும் ஏற்றுக்கொண்டதாக அறிவித்தார்.

இந்தக் கணவன் மீது இதே குற்றத்திற்காக பத்து தினங்களுக்கு முன்னர் இதே நீதிமன்றத்தில் இடைநிறுத்தப்பட்ட சிறைத்தண்டனை ஒன்று வழங்கப்பட்டிருந்தது. இந்த விடயம் நீதிமன்றத்தில் வெளியிடப்பட்டதையடுத்து நீதவான் எவ்வித தயவுதாட்சணியமும் காட்டாமல், இந்த தடவை இரண்டரை ஆண்டு கால கடுங்காவல் சிறைத்தண்டனை விதித்து தீர்ப்பளித்தார்.

இரண்டரை வருடங்களுக்கு பின்னர் சிறையிலிருந்து விடுவிக்கப்படும் அந்த மனிதன் திருந்துவானா? அல்லது தொடர்ந்தும் மனைவிக்கு சித்திரவதை செய்து கொண்டிருப்பான என்பது ஒரு பெரிய கேள்விக் குறியாக அமைந்துள்ளது.