இந்த புதுமையான தண்டனை அந்த மனிதனை நல்லவனாக்கிவிட்டது

by **நண்பன்** Tue 9 Aug 2011 - 5:00

இந்த புதுமையான தண்டனை அந்த மனிதனை நல்லவனாக்கிவிட்டது
இந்த மனிதன் நாளாந்தம் தான் கடும் உழைப்பின் மேசன் தொழில் மூலம் சம்பாதிக்கும் 1000 முதல் 1500 ரூபாவை மது அருந்த செலவிட்டு, வெறுங்கையோடு வீட்டுக்கு வந்து தனது மனைவி மக்களை துன்புறுத்தி வந்திருக்கிறான்.

வீட்டு செலவுக்கு ஒரு செப்புக் காசையும் கொடுக்காமல் பிள்ளைகளையும், மனைவியையும் மது போதையில் அடித்தும், உதைத்தும், துன்புறுத்தும் இந்த மனிதனின் கொடுமை குறித்து, அவனது மனைவியின் தாயார் மீகாவத்தை பொலிஸ் நிலையத்திற்கு சென்று புகார் செய்திருக்கிறார்.

அந்தப் புகாரை அடுத்து, பொலிஸார் அம்மனிதனை அழைத்து வந்து விசாரணை செய்ய எத்தணித்த போது அவன் மது போதையில் மயக்க நிலையில் இருந்திருக்கிறான். அவனுக்கு ஒரு நல்ல பாடத்தை கற்பித்து, இத்தீய பழக்கத்தை கைவிடச் செய்ய வேண்டும் என்ற எண்ணத்தில் அந்த மனிதனை அங்குள்ள மதிநுட்பமிக்க ஒரு பொலிஸ் உத்தியோகஸ்த்தர் லொக்கப்பில் போட்டு அடைத்துவிட்டார்.

சுமார் 15 மணித்தியாலயங்களுக்கு பின்னர் அவன் மது மயக்கத்திலிருந்து விடுபட்டு, சுயநினைவை பெற்ற பின்னர் அவனை பொலிஸ் கூண்டிலிருந்து வெளியில் எடுத்து அந்த பொலிஸ் உத்தியோகத்தர் அவனை அடிக்கவோ, மிரட்டவோ இல்லை. வாழ்க்கையின் யதார்த்தம் பற்றி அவனுக்கு ஒரு நற்போதனை செய்து இனிமேலாவது மது அருந்தாமல், குடும்பத்தை காப்பாற்று என்று புத்திமதி சொல்லி விடுவித்திருக்கிறார்.

இப்போது அந்த மனிதன் மது அருந்துவதில்லையாம். வீட்டுக்கு மாலைப் பொழுதில் திரும்பும் போது அவன் கைப்பை நிறைய காய்கறிகள், பழவர்க்கங்கள் போன்ற தின்பண்டங்களை எடுத்து வந்து மனைவி மக்களுடன் மகிழ்ச்சியாக வாழ்ந்து கொண்டிருப்பதாக பொலிஸார் தெரிவித்தனர்.

இவ்விதம், முன்மாதிரியான பொலிஸ் உத்தியோகத்தர் அதிகமாக இருந்தால் மதுப்பிரியர்களை நாம் ஒரு நொடிப்பொழுதில் திருத்திவிடலாம் அல்லவா?