வருங்காலத் தொழில்நுட்பம் - டி.வி.+ இணையம்!

'The Social Network' 500 மில்லியன் நண்பர்களை உருவாக்கியவரானாலும்,
தனித்து இருப்பதைத் (loneliness) தவிர்க்க முடியாது என்ற கோணத்தில்
ஃபேஸ்புக் நிறுவனரான மார்க் ஸக்கர்பெர்க்கின் வாழ்க்கையைக் காட்சிப்படுத்தி
இருக்கும் சினிமா.
ஃபேஸ்புக்
தொடங்கப்பட்ட 2003-ல் இருந்து, ஒரு மில்லியன் பயனீட்டாளர்களை அது அடைவது
வரையிலான நிகழ்வுகளைக் காதல், காமம், கல்லூரி வாழ்க்கை, நட்பு, துரோகம்
என்று கதம்பமாக அள்ளித் தெளிக்கிறார் கதாசிரியர் ஆரன் சோர்கின்.
ஸக்கர்பெர்க்காக நடித்திருக்கும் ஜெசி அய்சன்பெர்க்கின் நடிப்பு பிரமாதம்!
20 வயதான அவனுக்குப் பிரபலமான ஹார்வர்ட்
பல்கலைக்கழகத்தில் படிக்கும் வாய்ப்பு கிடைக்கிறது. எவருடனும் எளிதில்
நட்புகொள்ள முடியாத ஒருவித தனிமை விரும்பி என்றாலும், தன்னைச் சுற்றி
நடக்கும் நிகழ்வுகளை மிகக் கூர்மையாகக் கவனித்து, அலசும் திறன் உண்டு.
தனிப்பட்ட விதத்தில் நட்பு வட்டம் இல்லை என்றாலும், மனித நட்பு வட்டங்களைப்
புரிந்துகொண்டு அவர்களது சமூக இடர்ப்பாடு அனுபவங்களை இணையத்தில் லகுவாகக்
கொண்டுவர முடிந்ததை விஷுவலாகச் சொல்லியிருக்கும் இடங்கள்
பிரமிக்கவைக்கின்றன. இளைய + இணைய சமுதாயம் பார்க்க வேண்டிய படம்!
ஓ.கே. Digital Convergence பற்றி அலசிக்கொண்டு
இருந்தோம். டி.வி-யையும் இணையத்தையும் இணைக்க, மேற்கொள்ளப்பட்ட/பட்டு
வருகிற முயற்சிகளையும் அவற்றின் தாக்கங்களையும் பார்க்கலாம்.
இணையத்தின் ஆதிக்கம் பரவி வரும் இந்த நாளிலும், டி.வி
என்பதே மிகப் பரவலாக மக்களை அடையும் ஊடகம். கிட்டத்தட்ட 7 பில்லியன்
மக்கள்தொகை கொண்ட இந்த புவிக்கோளத்தில், 4 பில்லியன் பேர்களை டி.வி
சென்றடைவதாகச் சொல்கிறது புள்ளிவிவரம். அமெரிக்க டி.வி. பயனீட்டாளர்
மட்டும் ஒரு நாளைக்கு சராசரியாக ஐந்து மணி நேரம் செலவிடுகிறாராம். ஆனால்,
இணையம் மற்றும் அலைபேசி தொழில்நுட்பங்கள், டி.வி. கொடுக்கும் பொழுதுபோக்கு
மற்றும் தகவல் தொடர்பு பயன்பாடுகளில் குறிப்பிடத்தக்க தாக்கத்தைத்
தொடர்ந்து ஏற்படுத்திவருவது தெரிந்ததே!
டி.வி-யில் நிகழ்ச்சிகள் வெளியிடும்போதுதான் நீங்கள்
பார்க்க முடியும். இணையத்தில் நீங்கள் எப்போது எதைப் பார்க்க வேண்டும்
என்று விரும்புகிறீர்களோ, அதை அப்போது பார்க்க முடிகிறது. டி.வி. அகலமாக
இருக்கிறது. அதன் விளம்பரங்கள் முழு திரையிலும் தெரிகிறது. கணினியில்
இணையம் மூலமாகப் பார்க்கும் விளம்பரங்கள் திரையில் ஒரு பகுதியை மட்டுமே
ஆக்கிரமிக்க முடியும். இரண்டு ஊடகங்களுக்கும் இடையே உள்ள சில
ஒற்றுமைகளையும் பல எதிர்மறைகளையும் சொல்லிக்கொண்டே போகலாம்.
இன்னும்
சில ஆண்டுகளில் நீங்கள் பார்க்கும் நிகழ்ச்சி, டி.வி-க்காகத்
தயாரிக்கப்பட்டதாகவோ, இணையத்துக்காகத் தயாரிக்கப்பட்டதாகவோ இருக்கலாம். அதை
உங்களது டி.வி-யிலோ, கணினியிலோ ஏன், அலைபேசியிலோ உங்கள் வசதிப்படி பார்க்க
முடியும். இந்தத் தகவல் ஒன்றிணைப்பு கொடுக்கும் வியாபார வாய்ப்புகள் இணைய
ஜாம்பவான் நிறுவனங்களைப் பல்வேறு பரிசோதனைகளைச் செய்ய வைத்தபடி உள்ளன.
டி.வி-க்குள் இணையத்தையும் இணையத்துக்குள் டி.வி-யையும் கொண்டுவரும் சில
முயற்சிகளைப் பார்க்கலாம்!
முதலில் மைக்ரோசாஃப்ட். டி.வி. என்ற சாதனம்
இருக்கையில், இணையத்தில் இணைக்க கணினி என்ற மற்றொரு சாதனம் தேவை இல்லை என்ற
நோக்கத்தில் வெளியிடப்பட்ட மைக்ரோசாஃப்டின் வெப் டி.வி. (http://www.webtv.com/)
அத்தனை பிரபலம் ஆகவில்லை. டி.வி. பார்த்துக்கொண்டு இருக்கும்போது இணையம்
செல்ல முடியாது என்ற பெருங்குறையுடன், மோசமான பயனீட்டாளர் அனுபவத்தைக்
கொடுக்கும் வெப் டி.வி-யை மைக்ரோசாஃப்ட் விரைவில் கல்லறைக்கு அனுப்பிவிடும்
என்றே தோன்றுகிறது.
அடுத்து ஆப்பிள். இந்த நிறுவனத்தின் ஆப்பிள் டி.வி. (http://www.apple.com/appletv/)
சாதனம் இணையத்தையும் டி.வி-யையும் நெருக்கமாகக் கொண்டுவரும் முயற்சிகளில்
முக்கியமானது. இதன் அடிப்படை சிம்பிள். சீட்டுக்கட்டு சைஸில் இருக்கும்
சாதனத்தை உங்கள் டி.வி-யில் இணைத்து, உங்கள் வீட்டு இணைய வயர்லெஸ்
நெட்வொர்க்கில் இணைத்துவிட்டால் போதும். உங்கள் கணினியில் பார்க்க முடிகிற
தகவல்களை வயர்லெஸ் சாதனத்துக்குப் பாய்ச்சி (streaming) அதை டி.வி-யில்
பார்த்துக்கொள்ளலாம். ஐ-போன், ஐ-பாட் போன்ற சாதனங்களில் இருந்தும் தகவல்
பாய்ச்சல் நடத்தலாம் என்பது இன்னொரு ப்ளஸ். தகவல்களைக் கொண்டுவரும்
இணைப்புக்கு இணையத்தைப் பயன்படுத்தும் இந்தத் தொழில்நுட்பம் ஆப்பிள்
ரசிகர்களால் வேகமாக ஏற்றுக்கொள்ளப்படும். ஆனால், சராசரிப்
பயனீட்டாளர்களுக்கு இதைப் பயன்படுத்துவதில் சிரமங்கள் இருக்கும். காரணம்,
ஆப்பிளின் சர்வாதிகாரக் கொள்கை. அவர்களது மென்பொருளான ஐட்யூன்ஸ் மூலமாக
மட்டுமே இந்தத் தகவல் பாய்ச்சலை நடத்த முடியும்.
கடைசியாக, பெரியண்ணா கூகுள் என்ன செய்கிறார்? கூகுளின் டி.வி. (http://www.google.com/tv/)
முயற்சி தொழில்நுட்பத்தில் பிரமாண்டமாகவும் பயனீட்டாளர் அனுபவத்தை
மேன்மைப்படுத்தும் என்பதாகத் தெரிகிறது. அடுத்த வருடத் தொடக்கத்தில்
வெளியிடப்படலாம் என்று நம்பப்படுகிற இந்தத் தொழில்நுட்பத்தைப் பயன்படுத்த
டி.வி இணைப்பு, இணைய இணைப்பு இரண்டுமே தேவை. உதாரணத்துக்கு 'பங்குச் சந்தை'
என்று தேடினால், இப்போது டி.வி. நெட்வொர்க்குகளில் வெளியாகிக்கொண்டு
இருக்கும் பங்குச் சந்தை செய்திகளும், பங்குச் சந்தை பற்றிய வலைதளச்
செய்திகளும் ஒன்றாக வெளியிடப்பட, உங்களுக்கு எது தேவையோ அதைப்
பார்த்து/படித்துக்கொள்ளலாம். டி.வி. பார்க்கும் அனுபவத்துக்கும், இணையத்தை
நுகரும் அனுபவத்துக்கும் இடையில் உள்ள வித்தியாசத்தை கூகுள்
நிரப்பிவிடுவதற்கான சாத்தியக்கூறுகள் தெரிகின்றன. பார்க்கலாம்.

அப்படியே நானும் ஒரு வேலையை தேடிக்கிறேன் நன்றி தகவலுக்கு!

:”@: :”@:

நன்றி பகிர்விற்க்கு :];: