5 ஆண்டுகளில் போலீஸ் நிலையங்களுக்கு சொந்த கட்டிடம்: சட்டசபையில் ஜெயலலிதா தகவல்

by **நண்பன்** Tue 9 Aug 2011 - 10:50

சென்னை, ஆக. 9-

சட்டசபையில் இன்று கேள்வி நேரத்தின் போது ஒ.கே.சின்னராஜ் எழுந்து மேட்டுப்பாளையம் தொகுதி, காரமடை மற்றும் சிறுமுகை காவல் நிலையங்களுக்கு சொந்த கட்டிடங்கள் கட்ட அரசு ஆவண செய்யுமா? என்று கேட்டார்.

இதற்கு பதில் அளித்து முதல்-அமைச்சர் ஜெயலலிதா கூறியதாவது:-

மேட்டுப்பாளையம் தொகுதியில் காரமடை காவல் நிலையம் 12.8.1953 முதல் நீண்ட காலமாக வாடகைக் கட்டிடத்தில் இயங்கி வருகிறது. இந்த போலீஸ் நிலையத்திற்கு புதிய கடிட்டம் கட்ட நிலம் கண்டறிவதில் இருந்த தேக்க நிலை தற்போது அகற்றப்பட்டு, உரிய நிலம் கண்டறியப்பட்டுள்ளது.
இதனைத் தொடர்ந்து 35 லட்சத்து 72 ஆயிரம் ரூபாய் மதிப்பீட்டில் கட்டிடம் கட்ட இந்த அரசு உத்தரவிட்டுள்ளது.

தமிழ்நாடு காவலர் வீட்டுவசதி கழகத்தின் மூலம் கட்டுமான பணிகள் உடனே தொடங்க உத்தரவிடப்பட்டுள்ளது. காரமடை காவல் நிலையத்திற்கு சொந்தமான கட்டிடம் விரைவில் கட்டப்பட்டு அக்காவல் நிலையம் சொந்தக் கட்டிடத்தில் இயங்கும் என்பதை தெரிவித்துக் கொள்கிறேன்.

கோவை மாவட்டம், மேட்டுப்பாளையம் தொகுதி, சிறுமுகை காவல் நிலையம் தற்போது வாடகைக் கட்டிடத்தில் இயங்கி வருகிறது. மேற்படி காவல் நிலையத்திற்கு புதிய கட்டிடம் கட்ட உரிய நிலம் கண்டறியப்பட்டு விரைவில் புதிய கட்டிடம் கட்ட நடவடிக்கை மேற்கொள்ளப்படும்.

மாநிலத்தில் 1,258 சட்டம் மற்றும் ஒழுங்கு காவல் நிலையங்கள், 196 மகளிர் காவல் நிலையங்கள் மற்றும் 38 இருப்புப் பாதை காவல் நிலையங்கள் உள்பட மொத்தம் 1,492 காவல் நிலையங்கள் உள்ளன. 2001 முதல் 2006 வரையிலான எனது முந்தைய ஆட்சிக் காலத்தில் 221 காவல் நிலையங்களுக்கு புதிய கட்டிடங்கள் கட்டப்பட்டன. 2006 முதல் 2011 வரையிலான காலக்கட்டத்தில் 149 காவல் நிலையங்களுக்கு புதிய கட்டிடங்கள் கட்டப்பட்டன.

தற்போது வாடகைக் கட்டிடங்களில் இயங்கி வரும் 282 காவல் நிலையங்களில், 92 காவல் நிலையங்களுக்கு சொந்தக் கட்டிடங்கள் கட்டு வதற்கான கட்டுமானப் பணிகள் நடைபெற்று வருகின்றன. மீதமுள்ள 190 காவல் நிலையங்களில் 11 காவல் நிலையங்களுக்கு புதிய கட்டிடங்கள் கட்டுவது தொடர்பான செயற்குறிப்பு அரசின் பரிசீலனையில் உள்ளது. மீதமுள்ள 179 காவல் நிலையங்களில் 15 காவல் நிலையங்களுக்கு தற்போது நிலம் கண்டறியப்பட்டு, மேற்படி நிலங்கள் கட்டிடம் கட்ட உகந்தது தானா என்பதற்கான அறிக்கை தமிழ்நாடு காவலர் வீட்டு வசதிக் கழகத்திடம் கோரப்பட்டுள்ளது.164 காவல் நிலையங்களுக்கு புதிய கட்டிடம் கட்ட நிலங்கள் கண்டறிய நடவடிக்கை மேற்கொள்ளப்படும்.

இந்த 5 ஆண்டு கால ஆட்சி முடிவதற்குள், தமிழ்நாட்டில் உள்ள அனைத்து காவல் நிலையங்களும் சொந்தக் கட்டிடங்களிலேயே இயங்கும் என்பதை தெரிவித்துக் கொள்கிறேன்.

by **jasmin** Tue 9 Aug 2011 - 13:06

அப்பதானே காசு பார்க்க முடியும் நடக்கட்டும் நடக்கட்டும்

5 ஆண்டுகளில் போலீஸ் நிலையங்களுக்கு சொந்த கட்டிடம்: சட்டசபையில் ஜெயலலிதா தகவல்

5 ஆண்டுகளில் போலீஸ் நிலையங்களுக்கு சொந்த கட்டிடம்: சட்டசபையில் ஜெயலலிதா தகவல்

Re: 5 ஆண்டுகளில் போலீஸ் நிலையங்களுக்கு சொந்த கட்டிடம்: சட்டசபையில் ஜெயலலிதா தகவல்