அந்தியூர் திருவிழா சந்தையில் குதிரை விலை ரூ.6 லட்சம்

by **நண்பன்** Wed 10 Aug 2011 - 4:29

அந்தியூர் : அந்தியூர் புதுப்பாளையத்தில் பிரசித்தி பெற்ற குருநாதசுவாமி
கோயில் உள்ளது. இக்கோயில் ஆடித்தேர்த்திருவிழா இன்று நடக்கிறது. இதை
முன்னிட்டு களைகட்டியுள்ள கால்நடை சந்தையில் ஒரு லட்சம் மாடு, குதிரைகள்
குவிந்துள்ளன. ஒரு குதிரை விலை ரூ.6 லட்சத்தை தொட்டுள்ளது.
திருவிழாவையொட்டி 13ம் தேதி வரை முக்கிய நிகழ்வாக குதிரை மற்றும் கால்நடை
சந்தை மாநில அளவில் நடைபெறும். இதற்காக விலை உயர்ந்து குதிரைகள், மாடுகள்,
பசுக்கள் வந்து குவிந்துள்ளன. நடனமாடும் நொக்ரா ரக குதிரை திருமணம், கோயில்
திருவிழா போன்ற விழாக்களில் பங்கேற்கும்.

இந்த ரகக் குதிரைகளை
மேவாணி தேசக்குமார், அன்னூர் வேலுச்சாமி ஆகியோர் கொண்டு வந்துள்ளனர். ஒரு
குதிரைக்கு ரூ.5 லட்சம் விலை நிர்ணயித்துள்ளனர்.
ரேஸ்களுக்கு பயன்படும்
ரகமான கோனி, இங்கிலீஸ் ப்ரீடு குதிரைகள் விற்பனைக்கு வந்துள்ளன.
அறந்தாங்கி பாபு என்பவர் மார்வார், மினியேச்சர் (குள்ளரகம்), சினிமாக்களில்
நடிக்கும் குரங்கு ரேங்கிலா குதிரைகளையும் சத்தி இளங்கோ என்பவர், பஞ்சாப்
சேட்டக் ரக குதிரைகளையும் கொண்டு வந்துள்ளனர்.

சரவணம்பட்டி தம்பி
என்பவர் பஞ்ச கல்யாணி குதிரைக்கு ரூ.5 லட்சம் விலை கூறுகிறார். இந்த
குதிரையை வளர்த்தால் வாழ்க்கை நலமாக அமையும் என்று தெரிவித்தார்.
நடிகர்
சூர்யா நடித்து வெளிவர உள்ள ‘ஏழாம் அறிவு‘ படத்தில் நடித்துள்ள மார்வார்
ரக குதிரையும் வந்துள்ளது. இது தான் சந்தைக்கு வந்துள்ள குதிரைகளில் அதிக
விலை கொண்டது. அதன் விலை ரூ.6 லட்சம். ஏராளமான மாடுகளும் விற்பனைக்காக
வந்துள்ளன. 30 லிட்டர் பால் வரை ஒரு நாளைக்கு கறக்கும் ஜாப்ரா ரக எருமை
மாடுகள் நஞ்சுண்டாபுரத்தை சேர்ந்த சாமியாத்தாள் கொண்டு வந்துள்ளார். இதன்
விலை ரூ.60 ஆயிரம்

தினகரன்