சொத்து குவிப்பு வழக்கில் நிரபராதி என்பதை கோர்ட்டில் நிரூபிப்பேன்: ஜெகன்மோகன் ரெட்டி பேட்டி

நகரி, ஆக 11-

மறைந்த ஆந்திர முன்னாள் முதல்-மந்திரி ராஜசேகர ரெட்டியின் மகன் ஜெகன்மோகன் ரெட்டி காங்கிரசில் இருந்து விலகி ஒய்.எஸ்.ஆர். காங்கிரஸ் என்ற கட்சியை தொடங்கினார்.

இக்கட்சி சார்பில் அவர் கடப்பா எம்.பி. தொகுதியில் போட்டியிட்டு வெற்றி பெற்றார். இந்நிலையில் ஆந்திர மந்திரி சங்கர்ராவ், தெலுங்கு தேசம் மூத்த தலைவர் எர்ரன் நாயுடு ஆகியோர் ஜெகன்மோகன் ரெட்டி மீது சொத்துக் குவிப்பு வழக்கு பதிவு செய்ய உத்தரவிடுமாறு ஆந்திர ஐகோர்ட்டில் வழக்கு தொடர்ந்தனர்.

இதை விசாரித்த ஐகோர்ட்டு குற்றச்சாட்டு குறித்து விசாரித்து அறிக்கை தாக்கல் செய்யுமாறு சி.பி. ஐ.க்கு கடந்த மாதம் உத்தரவிட்டது. இதையடுத்து 2 வாரத்திற்கு முன்பு சி.பி.ஐ. விசாரணை நடத்தி முதல் கட்ட அறிக்கையை தாக்கல் செய்தது.

இதையடுத்து நேற்று ஐகோர்ட்டு நீதிபதிகள் ஜெகன்மோகன் ரெட்டி மீது கிரிமினல் வழக்கு பதிவு செய்யும்படி சி.பி.ஐ.க்கு உத்தரவிட்டது.

இதுபற்றி ஜெகன் மோகன் ரெட்டி கடப்பாவில் நிருபர்களிடம் கூறியதாவது:-

காங்கிரஸ் கட்சி என்னை பழி வாங்கும் நோக்கில் பொய் வழக்கு போட்டு வருகிறது. நான் அளவுக்கு அதிகமாக சொத்து குவித்திருப்பதாக வழக்கு தொடர்ந்துள்ளனர். நான் சேர்த்த அனைத்து சொத்துக்களுக்கும் முறையான கணக்கு வைத்திருக்கிறேன். நான் நிரபராதி என்பதை கோர்ட்டில் நிரூபிப்பேன்.

தெலுங்கு தேசம்- காங்கிரஸ் ஆகிய 2 கட்சிகளும் சேர்ந்து என்னை எப்படியாவது ஒழித்துவிட வேண்டும் என்பதில் மிகவும் மும்முரமாக உள்ளனர். இது ஒருபோதும் நடக்காது. ஆந்திர மக்களின் ஆதரவு எனது கட்சிக்குதான் உள்ளது. அடுத்த தேர்தலில் நாங்கள் நிச்சயம் ஆட்சியைப் பிடிப்போம்.

இவ்வாறு அவர் கூறினார்.

ஆந்திர மாநிலம் நகரியில் நடந்த ஒய்.எஸ்.ஆர். காங்கிரஸ் கட்சி பொதுக்கூட்டம் நடிகை ரோஜா தலைமையில் நடந்தது. அப்போது அவரது முன்னிலையில் தெலுங்கு தேசம் கட்சியை சேர்ந்த ஆயிரத்திற்கும் மேற்பட்ட தொண்டர்கள் ஒய்.எஸ்.ஆர். காங்கிரஸ் கட்சியில் சேர்ந்தனர்.

பின்னர் ரோஜா பேசும் போது, ஜெகன்மோகன் ரெட்டியை அரசியலில் இருந்து ஒழித்துக்கட்ட காங்கிரஸ் கட்சி பொய் வழக்கு போட்டு வருகிறது. ஜெகன்மோகன் ரெட்டி ஆட்சிக்கு வந்தால் ராஜசேகர ரெட்டி மர்ம சாவு பற்றி மீண்டும் விசாரணை நடத்தப்படும் என்றார்.