பெண்ணைத் தாக்கிய மர்ம மனிதனின் விவகாரத்தால் ஓட்டமாவடியில் பொலிஸார், பொதுமக்கள் மோதல் _

மட்டக்களப்பு, வாழைச்சேனை நாவலடிப்பகுதியில் பெண்ணொருவரை தாக்கிய மர்ம மனிதனை பொலிஸார் விடுவித்துவிட்டதாக பரவிய வதந்தியை அடுத்து ஓட்டமாவடி பொலிஸாருக்கும் பொதுமக்களுக்குமிடையில் ஏற்பட்ட மோதலால் அப்பகுதியில் நேற்று பெரும் பதற்றநிலை ஏற்பட்டது. பொலிஸாருக்கும் பொதுமக்களுக்கும் இடையில் ஏற்பட்ட மோதலில் இரு பொலிஸார் உட்பட 6 பேர் காயமடைந்தனர். சம்பவத்தில் பொலிஸாரின் துப்பாக்கிச் சூட்டுக்கு இலக்காகி மீராவோடை பகுதியைச் சேர்ந்த எம்.பாறூக் ஹாஜியார் என்பவர் படுகாயமடைந்த நிலையில் மட்டக்களப்பு போதனா வைத்தியசாலையில் அனுமதிக்கப்பட்டுள்ளார்.

இந்தச் சம்பவம் குறித்து தெரியவருவதாவது: கிழக்கு மாகாணத்தில் மர்ம மனிதர்களின் செயற்பாட்டினால் பெரும் பதற்றம் நிலவிவருகின்றது. இந்த நிலையில் வாழைச்சேனை, நாவலடி பகுதியைச் சேர்ந்த உசனார் மர்சூகா என்ற பெண் நேற்று முற்பகல் 11மணியளவில் பக்கத்து வீட்டிற்கு செல்வதற்காக சென்றுள்ளார். அவ்வேளையில் அந்த இடத்தில் மறைந்திருந்த மர்ம மனிதன் என்று சந்தேகிக்கப்படும் ஒருவர் இந்தப் பெண் மீது தாக்குதல் நடத்தி விட்டு தப்பியோடி உள்ளார்.

இந்த மர்ம மனிதனை மடக்கிப் பிடித்த பிரதேச மக்கள் வாழைச்சேனை பொலிஸாரிடம் ஒப்படைத்துள்ளனர். இந்த நபரை பொலிஸார் விடுவித்து விட்டதாக வெளியான தகவலை அடுத்து பொலிஸாருக்கும் பொதுமக்களுக்குமிடையில் பெரும் வாக்குவாதம் ஏற்பட்டு அது மோதலாக வெடித்துள்ளது.

பொலிஸார் மீது பொதுமக்கள் கற்கள் , போத்தல்கள் என்பவற்றை வீசி தாக்குதல் நடத்தியுள்ளனர். இத்தாக்குதலை அடுத்து பொலிஸார் வானத்தை நோக்கி துப்பாக்கிப் பிரயோகம் மேற்கொண்டனர்.

பொலிஸாரின் துப்பாக்கிச் சூட்டுக்கு இலக்காகி ஒரு பொதுமகன் படுகாயமடைந்ததுடன் தாக்குதலில் மூன்று பொதுமக்களும் இரண்டு பொலிஸாரும் சிறு காயங்களுக்குள்ளாகியுள்ளனர். துப்பாக்கிச் சூட்டில் காயமடைந்த பாறூக் ஹாஜியார் வாழைச்சேனை வைத்தியசாலைக்கு எடுத்துச் செல்லப்பட்டு பின்னர் அங்கிருந்து மட்டக்களப்பு போதனா வைத்தியசாலைக்கு மாற்றப்பட்டார். ஏனைய பொலிஸாரும் பொதுமக்களும் மீறாவோடை, வாழைச்சேனை வைத்திசாலைகளில் சிகிச்சை பெற்று வருகின்றனர்.

பொலிஸாருக்கும் பொதுக்களுக்குமிடையில் பெரும் கலவரம் வெடித்தமையினால் ஓட்டமாவடி நகரில் கடைகள், பூட்டப்பட்டதுடன் போக்குவரத்தும் ஸ்தம்பிதம் அடைந்தது. பல நூற்றுக்கணக்கில் கூடிய பொதுமக்கள் ஆத்திரமடைந்து பொலிஸார் மீது தாக்குதல் நடத்தினர். இத்தாக்குதலில் வாழைச்சேனை பொலிஸ் நிலையத்திற்கு சொந்தமான இரண்டு ஜீப் வண்டிகளும் சேதமடைந்தன.

பொது மக்கள் வீதியின் குறுக்காக டயர்களை போட்டு எரித்ததுடன் எதிர்ப்பு ஆர்ப்பாட்டத்திலும் ஈடுபட்டனர்.

நேற்று நண்பகல் ஆரம்பித்த இந்த கலவரம் நேற்று மாலைவரை நீடித்தது. பெண்ணை தாக்கியதாக கூறப்படும் மர்ம மனிதரிடம் வாழைச்சேனை பொலிஸார் விசாரணைகளை மேற்கொண்டு வருகின்றனர். _

நல்ல பதிவு நன்றி