இரண்டு கருப்பைகளில் தனித்தனியாக 2 ஆண் குழந்தைகள் :மருத்துவ உலகின் அதிசயம்

by **முனாஸ் சுலைமான்** Thu 11 Aug 2011 - 16:23

இரண்டு கருப்பைகளில் தனித்தனியாக 2 ஆண் குழந்தைகளை பெற்றெடுத்துள்ளார் பீகாரைச் சேர்ந்த பெண்ணொருவர்.

50 மில்லியன் பெண்களில் யாராவது ஒருவருக்கு இரண்டு கருப்பைகள் இருக்கும் என்றும் அப்படியிருக்கும் இரு கருப்பைகளிலும் உருவாகி பிறக்கும் குழந்தைகள் பெரும்பாலும் குறையுடனேயே பிறக்கும் என்றும் குறிப்பிடப்படும் நிலையில் மேற்படி இரு குழந்தைகளும் நலமாக பிறந்ததோடு தாயும் நலமாக உள்ளார் என்பதால் இது மருத்துவ உலகின் பெரும் அதிசயமாகவே பார்க்கப்படுகிறது.

பீகார் மாநிலத்தில், பாட்னாவின் வட பகுதியிலுள்ள மதுராபூர் சாகியா என்ற கிராமத்தை சேர்ந்தவர் ரிங்கு தேவி (வயது 28) சமீபத்தில் சிசேரியன் முறையில் ஒரே பிரசவத்தில் இரு ஆண் குழந்தைகளை பெற்றெடுத்தார்.

இவருக்கு இயற்கையிலேயே இரு கருப்பைகள் உள்ள நிலையில் ஒவ்வொரு கருப்பையிலும் ஒவ்வொன்று என இரு சிசுக்கள் வளர்ந்துள்ளது. இது மருத்துவ உலகில் 50 மில்லியன் பேருக்கு ஒருவர் என்ற வகையில் நிகழும் அதிசயமாகும்.

மேலும், மேற்படி பிரசவத்தில் தாய்க்கோ அல்லது குழந்தைக்கோ ஆபத்து, குறைப்பிரசவம், கருச்சிதைவு ஏற்படுதல் மற்றும் எடை குறைந்த குழந்தைகள் பிறக்கும் வாய்ப்பு ஆகிய சிக்கல்கள் உள்ளன என்று குறிப்பிடப்படும் நிலையில், தற்போது ரிங்கு தேவிக்கு பிறந்துள்ள இரு குழந்தைகளும் நலமாகவுள்ளதாக மருத்துவர்கள் தெரிவித்துள்ளனர்.

கடந்த 4 வருடங்களுக்கு முன் சுக பிரசவத்தில் தேவிக்கு ஒரு குழந்தை பிறந்துள்ளது என்பது குறிப்பிடத்தக்கது. _