பதவிக்காக நாம் ஏங்குவதில்லை: ஸ்டாலின் பேச்சு

ஆவடி:" பதவிக்காக நாம் ஏங்குவதில்லை' என்று தி.மு.க., பொருளாளர் ஸ்டாலின், ஆவடியில் நடந்த பொதுக்கூட்டத்தில் ஆவேசமாக பேசினார்.

சென்னை ஆவடியில் தி.மு.க., பொதுக்குழு தீர்மான விளக்க பொதுக்கூட்டம் மாவட்டப் பொறுப்பாளர் சுதர்சனம் தலைமையில் நடந்தது.

அதில் கலந்து கொண்ட ஸ்டாலின் எம்.எல்.ஏ., பேசியதாவது; கடந்த தேர்தலில் வெற்றி வாய்ப்பை இழந்தோம். அதற்காக நாம் வெட்கப்படவில்லை. இங்கு திரண்டுள்ள கூட்டத்தை பார்க்கும் போது, நாம் தோற்றோமா என்றுதான் ஆச்சர்யமாக உள்ளது. தேர்தலில் வெற்றி பெற்றிருந்தால் கூட இவ்வளவு பெரிய எழுச்சி இருந்திருக்காது. அதே போல், ஆளும் கட்சியினருக்கு நாம் வெற்றி பெற்று விட்டோமா என்ற சந்தேகமும் இன்று வரை உள்ளது.பதவிக்காக நாம் ஏங்குவதில்லை. இப்போது தி.மு.க.,வினர் மீது பல்வேறு பொய் வழக்குகள் போட்டு அச்சுறுத்தப்படுகிறது.

நாம் உருவாக்கிய சமச்சீர் கல்வி திட்டத்தை கடந்த தேர்தல் அறிக்கையில் தெரிவித்திருந்தோம். அதை உடனேயே செயல்படுத்தினோமா; இல்லையே.அனுபவம் மிக்க கல்வியாளர்கள் அடங்கிய குழுக்கள் மூலம் பல்வேறு ஆய்வுகள் நடத்திய பின், 2011ம் ஆண்டு செயல்படுத்த இருந்தோம். அதற்குள் தேர்தல் வந்தது, ஆட்சி மாற்றம் ஏற்பட்டது. ஆட்சிக்கு வந்த அ.தி.மு.க.,வின் முதல் தீர்மானம், சமச்சீர் கல்வி திட்டத்தை ரத்து செய்யவேண்டும் என்பதுதான். அரசியல் நோக்கத்தோடு அ.தி.மு.க.,வால் உருவாக்கப்பட்ட அப்பிரச்னையில், சமச்சீர் கல்வியை அமல்படுத்த வேண்டும் என்று சுப்ரீம் கோர்ட் தீர்ப்பளித்தது.

அதே போன்று, சட்டசபையை புதிய தலைமைச் செயலகத்தில் நடத்தக்கூடாது என்ற அ.தி.மு.க., அதை பழைய இடத்திற்கு மாற்றியது.அது என்ன அண்ணா அறிவாலயத்தின் கிளையா; அல்லது தி.மு.க., மாவட்ட செயலர் அலுவலகமா; மக்களின் வரிப்பணத்தில் கட்டிய தலைமைச் செயலகத்தை பாழடிப்பது ஏன்;மறைந்த பிரதமர் இந்திராவின் ஆட்சிக்காலத்தில், ஆட்சி கவிழ்க்கப்பட்டு "மிசா' உட்பட பல்வேறு கொடுமைகளை அனுபவித்தபோதும், புதிய எழுச்சியுடன் மீண்டும் மீண்டும் ஆட்சியை பிடித்து, மக்கள் நலத்திட்டங்களை நிறைவேற்றிய தி.மு.க.,வை மக்கள் மறக்கமாட்டார்கள்.தேர்தலை மட்டுமே நாம் குறிக்கோளாக வைத்திருக்கவில்லை. நமது கட்சியைப் போல் தோற்ற கட்சியும் கிடையாது; வெற்றி பெற்ற கட்சியும் தமிழகத்தில் கிடையாது. இவ்வாறு ஸ்டாலின் பேசினார்.

பதவி ஆசை இல்லாதிருந்திருந்தால் ஆட்சியில் திமுக இருந்தபோது துணை முதல்வர் பதவியை பேராசிரியர் அன்பழகனுக்குக் கொடுத்திருக்கணும்... அதை ஏன் இவர் வாங்கினார்?