கொழும்பின் குட்டைப்பாவாடை அரசியல்! குட்டி தலிபானாக மாறும் அரசு

கொழும்பின் குட்டைப்பாவாடை அரசியல்! குட்டி தலிபானாக மாறும் அரசு

ஒழுக்க விழுமியங்கள் தொடர்பாகப் புதிய விதிமுறைகளை புத்தாண்டில் அரசு அமுலுக்குக் கொண்டுவரலாம் என்று எதிர்ப்பார்க்கப்படுகின்றது.


அப்படி புதிய விதிமுறைகள் அமுலுக்கு வந்தால் பொது இடங்களில் குட்டைப் பாவாடைகள் அணிவதற்கு தடை விதிக்கப்படும்.

கலாசார விவகார அமைச்சர் டி.பி.ஏக்கநாயக்க தனது அமைச்சின் கீழ் வரும் கலைப் பேரவைக்கு குட்டைப் பாவாடைகள் அணிவது சம்பந்தமான விதிமுறைகளை வகுக்குமாறு அறிவுறுத்தல்களை வழங்கியுள்ளார்.

குட்டைப்பாவாடைகள் அணிவதால் ஏற்படும் கலாசாரத் தாக்கங்கள் பற்றி தனக்கு முறைப்பாடுகள் கிடைத்துள்ளதாக அமைச்சர் தெரிவித்துள்ளார். இத்தகைய உடைகள் எமது கலாசாரத்தை மோசமாகப் பாதிப்பதாக சமய மற்றும் கலாசார நலன் சார் அமைப்புக்கள் அரசின் கவனத்துக்குக் கொண்டுவந்துள்ளன.

உல்லாசப் பயணிகளின் வருகையோடு இந்த நிலைமை மேலும் மோசமடைவதாகவும் அவை சுட்டிக்காட்டியுள்ளன. இவ்வாறு கரிசனை காட்டும் குழுக்கள் அல்லது அமைப்புக்கள் எவை என்பது பற்றி அமைச்சர் எதுவும் கூறவில்லை.

பேராசிரியர் கார்லோ பொன்சேகா தலைமையிலான கலைப் பேரவையின் கவனத்துக்கு இந்த விடயத்தை தான் கொண்டு வந்துள்ளதாகவும், இந்த விடயம் பற்றி இன்னமும் அமைச்சரவையில் ஆராயப்படவில்லை என்றும் அமைச்சர் கூறினார்.

மக்களின் தனிப்பட்ட உரிமைகளோடு தொடர்புடைய விடயத்தில் எவ்வாறு முடிவுகளை மேற்கொள்ளலாம் என்று அமைச்சரிடம் கேள்வி எழுப்பப்பட்டபோது, கலைப்பேரவை இது பற்றி ஆராய்ந்து சில சிபார்சுகளைச் செய்யும். அதன்பிறகு அந்த சிபார்சுகளின் அடிப்படையிலேயே சம்பந்தப்பட்ட விடயத்தில் கவனம் செலுத்தப்படும் என்றும் அமைச்சர் விளக்கமளித்தார்.

கலைப்பேரவையின் செயலாளர் இதுபற்றிக் கூறுகைளில் தமது கலைப்பேரவையால் இன்னும் இந்த விடயம் ஆராயப்படவில்லை என்றும் எனவே இது பற்றி இப்போதைக்கு எதுவும் கூற முடியாது என்றும் சொன்னார்.

இதேவேளை சிங்கள கலாசாரம் மற்றும் உரிமைகள் பற்றி அதிகமாகப் பேசும் சிஹல உறுமய கட்சியின் ஆலோசகர் உதய கம்மன்பிலவிடம் இதுபற்றி கேட்டபோது தனது கட்சி இது பற்றி அமைச்சரின் கவனத்துக்கு எந்த விடயத்தையும் கொண்டுவரவில்லை என்றார்.

ஆப்கானிஸ்தானிலும் இவ்வாறான குட்டைப் பாவாடைகளுக்கு தலிபான்கள் தடை விதித்துள்ளமை குறிப்பிடத்தக்கது.

ஆப்கானிஸ்தானிலும் இவ்வாறான குட்டைப் பாவாடைகளுக்கு தலிபான்கள் தடை விதித்துள்ளமை குறிப்பிடத்தக்கது.