சிம்பாப்வே அணி 5 ஓட்டங்களால் அதிர்ச்சி வெற்றி

சிம்பாப்வே அணி 5 ஓட்டங்களால் அதிர்ச்சி வெற்றி
பங்களாதேஷ¤க்கு எதிரான 3வது ஒரு நாள் போட்டியிலும் சிம்பாப்வே அணி வெற்றி பெற்று தொடரையும் கைப்பற்றியது. சிம்பாப்வே – பங்களாதேஷ் கிரிக்கெட் அணிகள் இடையிலான 3வது ஒரு நாள் போட்டி ஹராரேயில் நேற்று முன்தினம் நடந்தது.

முதலில் துடுப்பெடுத்தாடிய சிம்பாப்வே அணி நிர்ணயிக்கப்பட்ட 50 ஓவர்களில் 7 விக்கெட் இழப்புக்கு 250 ஓட்டங்கள் சேர்த்தது- அதிகபட்சமாக தைபு 83 ஓட்டங்களும், மசகட்சா 74 ஓட்டங்களும் எடுத்தனர். இறுதி கட்டத்தில் சிகும்புரா (31), கிரேக் எர்வின் (18) ஆகியோரின்அதிரடி சிம்பாப்வே 250 ஓட்டங்களை எட்ட உதவியது.

பின்னர் 251 ஓட்டங்கள் இலக்கை நோக்கி ஆடிய பங்களாதேஷின் தொடக்க ஆட்டக்காரர் தமிம் இக்பால் 44 ஓட்டங்கள் விளாசி நல்ல தொடக்கம் தந்தார். இதைத் தொடர்ந்து ஒரு பக்கம் விக்கெட் சரிய மத்திய வரிசை துடுப்பாட்ட வீரர் முஷ்பிகிர் ரகிம் நிலைத்து நின்று அணியை வெற்றிப் பாதைக்கு திருப்ப போராடினார். அந்த அணியின் வெற்றிக்கு கடைசி 12 பந்துகளில் 16 ஓட்டங்கள் தேவைப்பட்டது.

கைவசம் 3 விக்கெட்டுகள் இருந்தன. இதனால் பரபரப்பு ஏற்பட்டது. 49வது ஓவரில் 2 விக்கெட்டுகளை இழந்த பங்களாதேஷ் அந்த ஓவரில் 8 ஓட்டங்கள் எடுத்தது. இதையடுத்து கடைசி ஓவரில் பங்களாதேஷின் வெற்றிக்கு 8 ஓட்டங்கள் தேவைப்பட்டன. இறுதி ஓவரை வேகப்பந்து வீச்சாளர் போபு வீசினார். இதில் முதல் பந்தில் 2 ஓட்டங்கள் எடுத்த முஷ்பிகிர் ரகிம் தனது முதலாவது சதத்தை நிறைவு செய்தார்.

ஆனால் 2 வது பந்தில் ரகிம் (101) பிடி ஆகி விட்டார். முடிவில் பங்களாதேஷ் அணி 49.2 ஓவர்களில் 245 ஓட்டங்களுக்கு சகல விக்கெட்டுகளையும் இழந்தது. இதன் மூலம் 5 ஓட்டங்கள் வித்தியாசத்தில் சிம்பாப்வே அணி திரில் வெற்றியை ருசித்தது.

சிம்பாப்வே தரப்பில் உத்செயா 3 விக்கெட்டுகளும், போபு, ஜார்விஸ் தலா 2 விக்கெட்டுகளும், முந்தைய இரு ஆட்டங்களில் தலா 5 விக்கெட் சாய்த்த பிரையன் விடோரி ஒரு விக்கெட்டும் வீழ்த்தினர்.

இந்த வெற்றியின் மூலம் 5 போட்டி கொண்ட தொடரில் சிம்பாப்வே அணி 3 – 0 என்ற கணக்கில் தொடரை கைப்பற்றியது. 4 வது ஆட்டம் நாளை புலவாயோவில் நடக்கிறது.