புத்தளத்தில் கிறீஸ்பூதம்: மக்களுடன் மோதலில் கான்ஸ்டபிள் பலி, பலர் காயம்!

புத்தளத்தில் கிறீஸ்மனிதன் விவகாரம் தொடர்பாக பொலிஸாருக்கும் பொதுமக்களுக்கும் இடையில்
இன்றிரவு ஏற்பட்ட மோதலில் பொலிஸ் கான்ஸ்டபிள் ஒருவர் உயிரிழந்துள்ளதுடன் மேலும் ஒரு கான்ஸ்டபிள் உட்பட 6 பேர் காயமடைந்துள்ளனர்.

புத்தளம் மணல்குண்டுவ எனும் கிராமத்தில் கிறீஸ் மனிதன் என பொதுமக்கள் சந்தேகித்த நபர்
ஒருவரை அவர்கள் பிடிக்க முயன்றபோது, பொலிஸாரால் பொதுமக்கள் தடுக்கப்பட்டதையடுத்து பதற்றநிலை ஆரம்பமாகியது.

புத்தளத்திலிருந்து கிடைத்த தகவல்களின்படி, சந்தேக நபரை பொதுமக்கள் துரத்திச் சென்றபோது
அந்நபர் வீடொன்றுக்குள் புகுந்துகொண்டதாக தெரிவிக்கப்படுகிறது.

அப்போது பொதுமக்கள் அவ்வீட்டிற்குள் செல்வதை மோட்டார் சைக்கிளொன்றில் அங்கு வந்த பொலிஸ்
கான்ஸ்டபிள்கள் இருவர் தடுத்துள்ளனர். அதையடுத்து ஆத்திரமடைந்த பொதுமக்கள் பொலிஸாரின்
மோட்டார் சைக்கிளுக்கு தீவைத்துடன் கான்ஸ்டபிள் ஒருவரை தாக்கினர். மற்றொருவர் அங்கிருந்து
தப்பிச்சென்றார்.

அத்துடன் பொலிஸாரின் துப்பாக்கிப் பிரயோகத்தில் மேலும் 5 பொதுமக்கள் காயமடைந்ததாகவும்
தெரிவிக்கப்படுகிறது. பொலிஸார் வானத்தை நோக்கி துப்பாக்கிப் பிரயோகம் செய்ததாக சிலர்
தெரிவிக்கின்றனர்.

இப்பதற்றநிலை பின்னர் புத்தளம் நகருக்கும் பரவியது. புத்தளம் நகரில் பொலிஸ் கான்ஸ்டபிள்
ஒருவர் பொதுமக்களின் தாக்குதலில் உயிரிழந்துள்ளார். பின்னர், இராணுவத்தினரும்
வரவழைக்கப்பட்டு புத்தளம் நகரின் பாதுகாப்பு பலப்படுத்தப்பட்டது.