வடக்கு மக்களுடன் காவல்துறையினர் சுமூகமான உறவுகளைப் பேண வேண்டும்

வடக்கு பொதுமக்களுடன் காவல்துறையினர் சுமூகமான உறவுகளை பேண வேண்டியது அவசியமானது என லக்பிம பத்திரிகையின் ஆசிரியர் தலையகம் சுட்டிக்காட்டியுள்ளது.
நீண்ட காலமாக போரின் அழுத்தங்களை நேரடியாக அனுபவித்த மக்கள் சமூகமொன்றுடன் நிதானமாக நடந்து கொள்ள வேண்டும்.

வடக்கு கிழக்கில் கடமையாற்றும் காவல்துறை உத்தியோகத்தர்கள் மற்றும் ஏனைய அரச உத்தியோகத்தர்களுக்கு பிரதேச மக்கள் தொடர்பில் போதியளவு தெளிவுபடுத்த வேண்டுமென குறிப்பிடப்பட்டுள்ளது.

மக்களின் வாழ்வாதாரம், இந்து கலாச்சாரம், தமிழ்மொழி, சமூகப் பிரிவில் காணப்படும் ஏற்றத்தாழ்வுகள் போன்ற சகல விடயங்கள் தொடர்பிலும் காவல்துறை உத்தியோகத்தர்களுக்கும், அரச ஊழியர்களுக்கும் விளக்கமளிக்க வேண்டும்.

அநேக சந்தர்ப்பங்களில் வடக்கு கிழக்கு பிரதேசங்களுக்கு இடமாற்றம் பெற்றுச் செல்லும் காவல்துறை உத்தியோகத்தர்கள் தண்டனை அடிப்படையில் இடமாற்றம் பெற்றவர்களாக காணப்படுகின்றனர்.

ஒழுக்கக் கேடு காரணமாக அல்லது அரசியல் தலையீடு காரணமாக இவ்வாறு தண்டனை இடமாற்றம் பெற்று வடக்கு கிழக்கில் கடமையாற்ற அனுப்பி வைக்கப்படுகின்றனர்.

இவ்வர்று தண்டனை இடமாற்றம் பெற்றுச் சென்று கடமையாற்றும் உத்தியோகத்தர்களிடம் காத்திரமான சேவையை எதிர்பார்க்க முடியுமா என்பது கேள்விக்குறியாகும் என ஆசிரியர் தலையங்கத்தில் சுட்டிக்காட்டப்பட்டுள்ளது.

முறையான பயிற்சி பெற்ற, அனுபவமிக்க உத்தியோகத்தர்களை கடமையில் ஈடுபடுத்துவதே பொருத்தமாக அமையும் என தெரிவிக்கப்பட்டுள்ளது.

அரசாங்க அலுவலகங்களில் கடமையாற்றுவோரும் இந்த விடயங்கள் தொடர்பில் கவனம் செலுத்த வேண்டும்.

வடக்கு கிழக்கு வாழ் மக்களுக்கும் ஏனைய பிரதேச மக்களுக்கும் இடையில் நிலவி வரும் இடைவெளியை குறைப்பதற்கு நடவடிக்கை எடுக்கப்பட வேண்டுமென வலியுறுத்தப்பட்டுள்ளது.