அவசரகாலநிலை அடுத்த மாதம் நீக்கம்! பயங்கரவாத தடைச்சட்டத்தில் படையினருக்கு விஷேட அதிகாரங்கள்.

by **ஜிப்ரியா** Tue 23 Aug 2011 - 7:30

இந்திய மற்றும் உலக நாடுகளின் அழுத்தத்தைத் தொடர்ந்து அவசரகாலச் சட்டத்தை விரைவில் நீக்குவதற்குத் திட்டமிட்டுள்ள அரசு பதிலாக பயங்கரவாதத் தடைச் சட்டத்தை திருத்தியமைத்து அதன் மூலம் முப்படையினருக்கும் மேலதிக அதிகாரங்களை வழங்குவதற்கு அரசு திட்டமிட்டுள்ளது.
அவசர காலச் சட்டம் அடுத்த மாதம் 8 ஆம் திகதியுடன் முடிவுக்கு வருகிறது. இதனை மேலும் ஒரு மாதத்துக்கு நீடிக்கும் பிரேரணையை அரசு நாடாளுமன்றத்தில் சமர்ப்பிக்காது என்று எதிர்பார்க்கப்படுகிறது.
2005ஆம் ஆண்டு லக்ஸ்மன் கதிர்காமர் கொலையை அடுத்து மீண்டும் நடைமுறைக்குக் கொண்டு வரப்பட்ட அவசரகாலச்சட்டம், கடந்த ஆறு ஆண்டுகளாக மாதாமாதம் நீடிக்கப்பட்டு நடைமுறையில் உள்ளது.
அவசரகாலச் சட்டத்தை நீடிக்காது விட்ட இரண்டு வாரங்களில் பயங்கரவாதத் தடைச் சட்டத்தில் புதிய திருத்தங்களை செய்வதற்கான பிரேரணை நாடாளுமன்றத்தில் சமர்ப்பிக்கப்படவுள்ளதாக கொழும்பு அரசியல் வட்டாரங்கள் தெரிவிக்கின்றன.
அவசரகாலச் சட்டத்தின் மூலம் முப்படைகள் மற்றும் பொலிஸருக்குக் கிடைத்து வந்த மேலதிக அதிகாரங்களில் சிலவற்றைப் பயங்கரவாதத் தடைச் சட்டத்தின் மூலம் வழங்குவதற்கு அரசு தீர்மானித்துள்ளது.
அதற்காகவே பயங்கரவாதத் தடைச்சட்டத்தில் திருத்தங்களைக் கொண்டுவர அரசு முயற்சிக்கின்றது என்று அதிகாரிகள் கூறுகின்றனர்.