மரம் முறிந்து வீழ்ந்ததில் கணவன், மனைவி நசுங்கி பலி

விறகுவெட்ட சென்றவேளை பரிதாபம்

மரம் முறிந்து வீழ்ந்ததில்
கணவன், மனைவி நசுங்கி பலி




ஹாலிஎல தினகரன் நிருபர்

ஹப்புத்தளை பங்கெட்டிய காட்டுப் பகுதியில் விறகு வெட்ட சென்றவர்கள் மீது மரம் ஒன்று
திடீரென சரிந்து விழுந்ததில் கணவனும், மனைவியும் மரத்துக்கு அகப்பட்டு ஸ்தலத்திலேயே
பரிதாபகரமாக உயிரிழந்துள்ளதாக அப்புத்தளை பொலிஸார் தெரிவிக்கின்றனர்.
இந்த சம்பவம் (25) நேற்றுக் காலை 7.00 மணியளவில் அப்புத்தளை பங்கெட்டிய காட்டுப்
பகுதியில் இடம்பெற்றுள்ளது.
சம்பவத்தில் அப்புத்தளை பங்கெட்டிய பகுதியில் வசித்த எஸ். டபிள்யூ. திலகசேன வயது
(49) அவரது மனைவி எம். டபிள்யூ. விமலாவதி (48) ஆகியோரே இந்த பரிதாபகரமான மரணத்துக்கு
உள்ளாகியுள்ளதாக அப்புத்தளை பொலிஸார் தெரிவிக்கின்றனர்.
நேற்றுக்காலை குறித்த கணவனும், மனைவியும் தனது ஏழுவயது பிள்ளையுடன் குறித்த
காட்டுப்பகுதிக்கு விறகு தறிக்கச் சென்றுள்ளனர்.
இதன்போது அங்கிருந்த பாரிய மரமொன்று திடீரென விழுந்துள்ளது.
இவர்களுடன் சென்றிருந்த குறித்த 7 வயது பிள்ளை சற்று தொலைவில் நின்றிருந்தமையினால்
மயிரிழையில் உயிர் தப்பியது.
மரண விசாரணைகளையடுத்து சடலங்கள் நேற்று (25) மாலை உறவினர்களிடம் ஒப்படைக்கப்பட்டன.
அப்புத்தளை பொலிஸார் விசாரணைகளை மேற்கொண்டு வருகின்றனர்.