அன்னா ஹசாரேயின் உண்ணாவிரதத்தை முடிவுக்கு கொண்டுவந்த பிரணாப்முகர்ஜி

by **நண்பன்** Sun 28 Aug 2011 - 10:47

அன்னா ஹசாரேயின் உண்ணாவிரதத்தை முடிவுக்கு
கொண்டு வருவதில் பிரணாப் முகர்ஜி தலைமையிலான குழுவினர் பெரும் பங்கு
வகித்தனர். அன்னா ஹசாரே தனது கோரிக்கையை நிறைவேற்றுவதில் உறுதியுடனும்
பிடிவாதமாகவும் இருந்ததால் போராட்டத்தை முடிவுக்கு கொண்டுவர மத்திய அரசு
திணறியது.

பாபாராம்தேவ் உண்ணா விரதத்தை எளிதில்
முடிவுக்கு கொண்டு வந்தது போல் அன்னாஹசாரேயிடம் கையாள முடியவில்லை. இதற்கு
காரணம் நாடு முழுவதும் அவருக்கு பொது மக்களிடம் உருவான எழுச்சி அலையே
காரணம்.

10 நாட்களை கடந்த பின்னரும் உயிரைப்பற்றி
கவலைப்படாமல் தைரியமாக உண்ணா விரதத்தை தொடர்ந்தார். இதனால் மத்திய அரசு
பணிந்தது. அவர் சொன்னதையெல்லாம் நிறைவேற்றுவதாக உறுதி அளித்ததுடன்
வரலாற்றிலேயே முதல் முறையாக உறுதிமொழியை எழுத்து மூலமாக கொடுத்தது.

பிரதமர்
இறங்கி வந்து பேச்சு நடத்த முடியாது என்பதால் பிரணாப் முகர்ஜி கையில்
பொறுப்பு ஒப்படைக்கப்பட்டது. பாராளுமன்ற நடைமுறையை காரணம் காட்டி லோக்பால்
தீர்மானம் தாமதமாவதை அவர் விரும்பவில்லை.

பாராளுமன்ற
விவகாரத்துறை மந்திரி பி.கே.பன்சால், சட்ட மந்திரி சல்மான் குர்ஷித்
ஆகியோருடன் நடைமுறை சிக்கல்கள் பற்றி விவாதித்தார். பின்னர் தீர்மானத்தை
அவசரமாக விவாதத்துக்கு எடுத்துக் கொள்ள முடிவு செய்யப்பட்டது.

இது
பற்றி அன்னா ஹசாரேயுடன் பேச்சு நடத்த மத்திய மந்திரி விலாஸ்ராவ்
தேஷ்முக்கை பயன்படுத்தினர். இவர் மராட்டியத்தைச் சேர்ந்தவர் என்பதாலும்,
அவரது போராட்டத்தை மராட்டிய மாநிலத்தில் சந்தித்தவர் என்பதாலும் அவர்
பயன்படுத்தப்பட்டார். பிரதமர் அலுவலக மந்திரி வி.நாராயணசாமி, சந்தீப்
தீட்சித் எம்.பி.யையும் பயன் படுத்திக் கொண்டார்.

இதற்கிடையே
அன்னா ஹசாரே உண்ணா விரதத்தால் காங்கிரஸ் எம்.பி.க்கள் தொகுதிக்கு
செல்லமுடியாத நிலை ஏற்பட்டது. அவர்களும் அரசுக்கு நெருக்கடி கொடுத்தனர்.
அரசுக்கு வெளியே இருந்தும் சில தலைவர்கள் மத்திய அரசிடம் போராட்டத்தை
முடிவுக்கு கொண்டுவர கேட்டுக்கொண்டனர்.

மாலை மலர்