சந்திரபாபு நாயுடு குடும்பத்தினருக்கு ரூ.40 கோடி சொத்து

by **நண்பன்** Sun 4 Sep 2011 - 8:41

தெலுங்கு தேசம் கட்சியின் தலைவரும் ஆந்திர மாநில முன்னாள்
முதல்-மந்திரியுமான சந்திரபாபு நாயுடு, சொத்து விபரங்களை நேற்று
அறிவித்தார். அதன்படி, அவருக்கும் அவருடைய குடும்பத்தினருக்கும் கடன்கள்
நீங்கலாக மொத்தம் ரூ.40 கோடி சொத்துகள் உள்ளன.

நாடு முழுவதும் ஊழலுக்கு எதிரான விழிப்புணர்வு அதிகரித்து வரும்
நிலையில், முக்கிய பதவியில் உள்ளவர்கள் அனைவரும் சொத்து விபரங்களை வெளியிட
வேண்டும் என்ற கருத்தும் பரவலாக எழுந்துள்ளது. இதற்கிடையே, லோக்பால் மசோதா
கேட்டு உண்ணாவிரதம் மேற்கொண்ட அன்னா ஹசாரே கைது செய்யப்பட்டபோது,
ஆந்திராவில் தெலுங்கு தேசம் கட்சி தலைவர் சந்திரபாபு நாயுடு போராட்டம்
நடத்தினார்.

மேலும், 10 கி.மீ. தூரத்துக்கு பாத யாத்திரையையும் நடத்தினார். ஆனால்,
அவருடைய நடவடிக்கை குறித்து ஆளும் கட்சியான காங்கிரஸ் உள்ளிட்ட கட்சியினர்
விமர்சனம் செய்தனர். அவர் மீது ரூ.2 ஆயிரம் கோடி சொத்து சேர்த்ததாகவும்
குற்றச்சாட்டு கூறினார்கள். இந்த நிலையில், தனது சொத்து விபரங்களை
சந்திரபாபு நாயுடு நேற்று பகிரங்கமாக அறிவித்தார்.

இது குறித்து அவர் கூறியதாவது:-

ஆந்திராவில் 1999-ம் ஆண்டு நான் முதல்-மந்திரியாக இருந்த போதே,
மந்திரிகளும் எம்.எல்.ஏ.க்களும் சொத்துகளை அறிவிக்கும் நடைமுறையை கொண்டு
வந்தேன். தற்போது, ஊழலுக்கு எதிரான போராட்டம் வலுவடைந்துள்ள நிலையில், எனது
குடும்பத்தினர் அனைவருடைய சொத்துகளையும் பகிரங்கமாக அறிவிக்க முடிவு
செய்துள்ளேன்.

மேலும், என் மீது ஆயிரம் கோடி, இரண்டாயிரம் கோடி என ஊழல் புகார்கள்
கூறப்படுகின்றன. வெறும் இரண்டு ஏக்கர் நிலத்தின் மூலமாக ரூ.2 ஆயிரம் கோடியை
எப்படி என்னால் சம்பாதிக்க முடியும். என் மீது குற்றச்சாட்டு
கூறுபவர்களுக்கு பதிலடி அளிக்கும் விதமாக எனது குடும்பத்தினரின் முழு
சொத்து விபரங்களையும் அறிவிக்கிறேன்.

இந்த சொத்துகள் அனைத்தும் நான் வாங்கும்போது உள்ள மதிப்பு ஆகும். சந்தை மதிப்பு அல்ல. அவ்வப்போது, அதன் மதிப்பு வேறுபடக்கூடும்.

தனிப்பட்ட முறையில் எனக்கு ரூ.39 லட்சத்து 88 ஆயிரம் ரூபாய் சொத்துகள்
உள்ளன. என்னுடைய மனைவி புவனேஸ்வரி பெயரில் ரூ.39 கோடியே 56 லட்சம் ரூபாய்
மதிப்பிலான சொத்துகள் உள்ளன. எங்களுடைய குடும்ப நிறுவனமான 'ஹெரிடேஜ்
புட்ஸ்' நிறுவனத்தின் தலைவராகவும் புவனேஸ்வரி செயல்படுகிறார்.
புவனேஸ்வரிக்கு ரூ.12 கோடியே 38 லட்சம் கடன் இருப்பதால் நிகர சொத்து
மதிப்பு ரூ.27 கோடியே 18 லட்சம் ஆகும்.

ஹைதராபாத் ஜூபிளி ஹில்ஸ் பகுதியில் எங்கள் குடும்பம் வசித்து வரும்
வீடு, வங்கிக் கடனில் உள்ளது. எனது மனைவி நடத்தும் வர்த்தக மேம்பாட்டுக்காக
அந்த வீட்டை அடகு வைத்துள்ளோம். எனது மகன் லோகேஷ் பெயரில் ரூ.6 கோடியே 82
லட்சம் சொத்து இருக்கிறது. ஆனால், ரூ.9 கோடிக்கு கடன் உள்ளது. இது போல,
எனது மருமகள் (லோகேஷ் மனைவி) பிராமணி பெயரில் ரூ.3 கோடியே 22 லட்சம் சொத்து
உள்ளது. இது, அவருடைய தந்தையான நடிகர் பாலகிருஷ்ணா அளித்தது.
திருமணத்துக்கு பிறகு, பிராமணி பெயரில் எந்த சொத்துகளையும் நாங்கள்
வாங்கவில்லை.

இத்தகைய தனிநபர் சொத்துகளை தவிர்த்து நிர்வனா ஹோல்டிங்ஸ் நிறுவனத்தில்
எங்கள் குடும்பத்துக்கு ரூ.15 கோடியே 75 லட்சம் மதிப்பில் பங்குகள் உள்ளன.
ஆனால், ரூ.15 கோடியே 37 லட்சம் கடன் இருக்கிறது.

எங்களுடைய குடும்ப நிறுவனமான 'ஹெரிடேஜ் புட்ஸ்', பொதுத் துறை நிறுவனமாக
பங்குச் சந்தையில் பட்டியலிடப்பட்டு இருக்கிறது. தற்போது, அதன் ஒரு பங்கு
மதிப்பு ரூ.172 ஆகும். நிறுவனத்தின் மொத்த சந்தை முதலீட்டு மதிப்பு ரூ.214
கோடி. எங்கள் குடும்பத்திடம் நிறுவனத்தின் 48.82 சதவீத பங்குகள் உள்ளன. அதே
நேரத்தில், அந்த நிறுவனத்தின் பெயரில் ரூ.95 கோடி அளவுக்கு கடன்
இருக்கிறது. இவ்வாறு சந்திரபாபு நாயுடு தெரிவித்தார்.