நூறு நாட்களுக்கு மேல் சிறைவாசமிருக்கும் கனிமொழி விரைவில் பிணையில் வரும் வாய்ப்பு

நூறு நாட்களுக்கு மேல் சிறைவாசமிருக்கும்
கனிமொழி விரைவில் பிணையில் வரும் வாய்ப்பு



2 ஜி ஸ்பெக்ட்ரம் ஊழல் வழக்கில் முன்னாள் மத்திய மந்திரி ஆ. ராசா, கனிமொழி எம்.பி.,
கலைஞர் தொலைக்காட்சி நிர்வாக இயக்குனர் சரத்குமார் உட்பட 15 பேர் கைது
செய்யப்பட்டனர்.

டில்லி திகார் சிறையில் அவர்கள் அடைக்கப்பட்டுள்ளனர். ஸ்பெக்ட்ரம்
ஊழல் வழக்கு தொடர்பான விசாரணை டில்லியில் உள்ள சி. பி. ஐ. சிறப்பு நீதிமன்றத்தில்
நடந்து வருகிறது.
இந்த நிலையில் சி. பி. ஐ. 3வது குற்றப் பத்திரத்தை அடுத்த வாரம் தாக்கல் செய்ய
உள்ளது. இதற்கிடையே ஏற்கனவே குற்றம் சாட்டப்பட்டவர்கள் மீதான விசாரணை விரைவில்
முடிவுக்கு வர உள்ளது. இந்த விசாரணை முடிந்து விட்டால், சிறையில் அடைக்கப்பட்டு
இருப்பவர்கள் பிணை கோரி மனு தாக்கல் செய்யலாம் என்று அறிவிக்கப்பட்டுள்ளது.
திகார் சிறையில் 100 நாட்களுக்கும் மேலாக இருந்து வரும் கனிமொழி சிறப்பு
நீதிமன்றத்தில் விசாரணை முடிந்ததும், தன்னை பிணையில் விடுதலை செய்யக் கோரி மனு
செய்வார் என்று எதிர்பார்க்கப்படுகிறது. சி. பி. ஐ. தரப்பில் இதற்கு எதிர்ப்பு
இருக்காது என்று தெரிகிறது.

எனவே கனிமொழி பிணையில் விடுதலை ஆகி வெளியில் வர வாய்ப்பு
பிரகாசமாகி உள்ளது. அனேகமாக இன்னும் 2 வாரங்கள் கழித்து அவர் விடுதலை ஆவார் என்று
எதிர்பார்க்கப்படுகிறது.
ஸ்பெக்ட்ரம் ஊழல் வழக்கு தொடர்பாக கைதானவர்களில் கனிமொழி தான் முதன் முதலாக பிணை
கோரி முறையீடு செய்தார் என்பது குறிப்பிடத்தக்கது. அப்போது விசாரணை முடிந்ததும் பிணை
கேட்கும்படி மேல் நீதிமன்றம் அறிவுறுத்தி இருந்தது. எனவே அவர் பிணை கோரி மனு செய்த
உடனேயே அவருக்கு விடுதலை கிடைத்து விடும் என்று சட்ட நிபுணர்கள் கருத்து
தெரிவித்துள்ளனர்.