ஸ்பெக்ட்ரம் வழக்கில் கைதான கனிமொழி விரைவில் விடுதலை ஆகிறார்: ஜாமீன் கிடைக்க வாய்ப்பு

2ஜி ஸ்பெக்ட்ரம் ஊழல் வழக்கில் முன்னாள் மத்திய மந்திரி ஆ. ராசா,
கனிமொழி எம்.பி., கலைஞர் டி.வி. நிர்வாக இயக்குனர் சரத்குமார் உள்பட 15
பேர் கைது செய்யப்பட்டனர். டெல்லி திகார் ஜெயிலில் அவர்கள்
அடைக்கப்பட்டுள்ளனர்.ஸ்பெக்ட்ரம் ஊழல் வழக்கு தொடர்பான விசாரணை டெல்லியில்
உள்ள சி.பி.ஐ. சிறப்பு நீதிமன்றத்தில் நடந்து வருகிறது.

இந்த
நிலையில் சி.பி.ஐ. 3-வது குற்றப் பத்திரிகையை அடுத்த வாரம் தாக்கல் செய்ய
உள்ளது. இதற்கிடையே ஏற்கனவே குற்றம் சாட்டப்பட்டவர்கள் மீதான விசாரணை
விரைவில் முடிவுக்கு வர உள்ளது. இந்த விசாரணை முடிந்து விட்டால், ஜெயிலில்
அடைக்கப்பட்டு இருப்பவர்கள் ஜாமீன் கோரி மனு தாக்கல் செய்யலாம் என்று
அறிவிக்கப்பட்டுள்ளது.

திகார் ஜெயிலில் 100
நாட்களுக்கும் மேலாக இருந்து வரும் கனிமொழி, சிறப்பு கோர்ட்டில் விசாரணை
முடிந்ததும், தன்னை ஜாமீனில் விடுதலை செய்யக் கோரி மனு செய்வார் என்று
எதிர்பார்க்கப்படுகிறது. சி.பி.ஐ. தரப்பில் இதற்கு எதிர்ப்பு இருக்காது
என்று தெரிகிறது. எனவே கனிமொழி ஜாமீனில் விடுதலை ஆகி வெளியில் வர வாய்ப்பு
பிரகாசமாகி உள்ளது. அனேகமாக இன்னும் 2 வாரங்கள் கழித்து அவர் விடுதலை ஆவார்
என்று எதிர்பார்க்கப்படுகிறது.

ஸ்பெக்ட்ரம் ஊழல்
வழக்கு தொடர்பாக கைதானவர்களில் கனிமொழி தான் முதன் முதலாக ஜாமீன் கோரி
அப்பீல் செய்தார் என்பது குறிப்பிடத்தக்கது. அப்போது விசாரணை முடிந்ததும்
ஜாமீன் கேட்கும்படி ஐகோர்ட்டு அறிவுறுத்தி இருந்தது. எனவே அவர் ஜாமீன் கோரி
மனு செய்த உடனேயே அவருக்கு விடுதலை கிடைத்து விடும் என்று சட்ட நிபுணர்கள்
கருத்து தெரிவித்துள்ளனர்.