முபாரக் விசாரணை ஆரம்பம் நீதிமன்றத்திற்கு வெளியில் ஆதரவாளர் - பொலிஸார் மோதல்

முபாரக் விசாரணை ஆரம்பம்

நீதிமன்றத்திற்கு வெளியில்
ஆதரவாளர் - பொலிஸார் மோதல்



எகிப்து முன்னாள் ஜனாதிபதி ஹொஸ்னி முபாரக் மீதான வழக்கு நேற்று முன்தினம் மூன்றாவது
முறையாகத் ஆரம்பமானது. இம்முறை முபாரக் ஆதரவாளர்களுக்கும், பொலிஸாருக்கும் இடையில்
நடந்த மோதலில் பலர் காயம் அடைந்தனர்.
கெய்ரோவில் உள்ள இராணுவ அகடமியில், தற்காலிக நீதிமன்ற வளாகத்தில் முபாரக் வழக்கு
நடந்து வருகிறது. இதற்கு முன்பு இரு முறை நடந்த விசாரணையின் போது, ஊடகங்கள் வழக்கை
ஒளிபரப்ப அனுமதிக்கப்பட்டன.

ஆனால் கடந்த ஓகஸ்ட் 15ம் திகதி நடந்த விசாரணையின்
இறுதியில் பெப்ரவரி புரட்சியில் கொல்லப்பட்டோரின் உறவினர் சிலர் நீதிமன்ற பெஞ்சுகள்
மீது ஏறி நின்று, முபாரக்கைத் தூக்கிலிட வேண்டும் என கோஷமிட்டதால் கடுப்பாகிப் போன
நீதிபதி, அடுத்த விசாரணையில், பாதுகாப்பு பலப்படுத்தப் பட்டு ஊடகங்களுக்குத் தடை
விதிக்கப்பட வேண்டும் என உத்தரவிட்டார்.
இதையடுத்து, நேற்று முன்தினம் இராணுவ மருத்துவமனையில் இருந்து முபாரக் படுக்கையில்
கொண்டு வரப்பட்டார். அவருடன் அவரது இரு மகன்கள் அலா மற்றும் கமால், முன்னாள் உள்துறை
அமைச்சர் ஹபீப் அல் அட்லி ஆகியோரும் வந்தனர். முபாரக் வரும் முன்பு நீதிமன்றத்தின்
வெளியில் திரண்டிருந்த அவரது ஆதரவாளர்கள், அங்கு பாதுகாப்பில் ஈடுபட்டிருந்த
பொலிஸார் மீது கல்லெறிய ஆரம்பித்தனர்.

இதையடுத்து இருதரப்பு மோதல் ஏற்பட்டது. இதில்
பலர் காயம் அடைந்தனர். அதேநேரம், நீதிமன்றத்தின் உட்புறம், பெப்ரவரி புரட்சியின்
போது மக்களை சுடச் சொல்லி உத்தரவிட்டது யார் என்பது குறித்து சாட்சிகள் விசாரணை
நடத்தப்பட்டது. தொடர்ந்து வழக்கு விசாரணை இன்றைய தினத்திற்கு ஒத்திவைக்கப்பட்டது.