வை.கோவுக்கு வி.புலிகள் நிதியுதவி?! : விக்கிலீக்ஸ்

வைகோ தலைமையிலான மதிமுக கட்சிக்கு, வி.புலிகள் நிதி உதவி செய்திருக்கலாம் என அமெரிக்க தூதரக தகவல்களை மேற்கோள் காட்டி விக்கிலீக்ஸ் தகவல் வெளியிட்டுள்ளது.



2006 இல் இந்தியாவுக்கான அப்போதைய அமெரிக்க தூதரக அதிகாரிகளில் ஒருவராக கடமை புரிந்த ரவி கன்டடை, 2006 சட்டமன்ற தேர்தலில் திமுக வெற்றி பெற்று ஆட்சிக்கு வந்த இரு நாட்களில் மே 15ம் திகதி இது தொடர்பான தகவல்களை அமெரிக்க அயலுறவு செயலகத்துக்கு அனுப்பியதாக விக்கிலீக்ஸ் தெரிவித்துள்ளது. அவருடைய அறிக்கையின் படி

தமிழக அரசியல் தலைவர்கள் சிலருக்கு வி.புலிகள் குறிப்பிடத்தக்க நிதி உதவி செய்திருக்கலாம். குறிப்பாக மதிமுக தலைவர் வைகோவுக்கு நிதி உதவி செய்யப்பட்டிருக்கலாம்.

1993ம் ஆண்டு திமுகவிலிருந்து வைகோ விலகியதிலிருந்து அவருக்கான ஆதரவினை வி.புலிகள் தொடர்ந்து வருகின்றனர். வைகோவும் விடுதலை புலிகளுக்கு வெளிப்படையாக தனது ஆதரவை தெரிவித்து வந்துள்ளார். எனினும் வழங்கப்பட்ட நிதி உதவிகள் எதுவுமே ஆதாரத்துடன் நிரூபிக்க முடியாததாக உள்ளன. முன்னாள் பிரதமர் ராஜீவ் கொலையுக்கு பின்னர் ஒரே இரவி வி.புலிகள் மீதான ஆதரவு போக்கு ஒரே இரவில் இல்லாமல் போனது.

கனடா, இங்கிலாந்து, நெதர்லாந்து, ஜேர்மனி, ஆகிய நாடுகளில் வாழும் அகதிகள் தங்களது வருமானத்தில் 10% வீதம் வி.புலிகளுக்கு நிதிஉதவியளித்து வந்தனர்.

தமிழ் கலை மன்றங்கள், மத ரீதியான அமைப்புக்கள் ஊடாக இந்த உதவி செய்யப்பட்டுள்ளது. தமிழ்நாட்டு மக்கள் பலர் இலங்கையின் சூழ்நிலையை கருத்தில்கொண்டு வி.புலிகளுக்கு ஆதரவான போக்கை கொண்டிருந்தனர்.

இலங்கையில் தொடர்ந்து இடம்பெற்று வரும் மனித உரிமை மீறல் சம்பவங்கள், தமிழ் மக்களுக்கு எதிரான நடவடிக்கைகள், இந்தியாவில் இலங்கை அகதிகளின் எண்ணிக்கை அதிகரிப்பு என்பன இந்த ஆதரவு போக்கினை தொடர்ந்து தக்கவைத்திருந்தன என ரவி கன்டடை தெரிவித்துள்ளதாக விக்கிலீக்ஸ் கூறியுள்ளது.