கேள்வி எனக்குள்

நன்றி living extra .com

சுய சிந்தனை, சுய எண்ணம் மட்டும் இருந்தாலே போதுமே.. எதற்கு இத்தனை கடவுள்களைப் பற்றி எழுதுகிறீர்கள்.. தப்பு நடக்கும்போது , நாம் தான் தட்டிக் கேட்க வேண்டும்.. ? தெய்வம் கேட்கட்டும் என்று ஏன் சும்மா நிற்க வேண்டும் என்று ஒரு சிலர் கேட்கிறார்கள்.. அவர்கள் சொல்வதனைத்தையும், பகுத்தறிவு , நாத்திக சிந்தனை என்று ஒதுக்கிவிட முடியாது.

நியாயமான கேள்விகள் தான்.
உங்களை மாதிரி பலம் பொருந்தியவர்கள் அவர்களுக்கு (கஷ்டப்படும் ஏழைகள்) உதவினால் பரவா இல்லை. ஒரு சில காரியங்களுக்கு , யார் உதவியும் பலன் அளிக்காது. தானாகவே நடந்தால்தான் உண்டு.

கட்டுரைகள் படிப்பவர்களின் சிந்தனையை தூண்டி , அவர்களே விரும்பி , ஆன்மீக வழியினில் செல்ல அடையாளம் காட்டுவது மட்டுமே. சில நல்ல தகவல்களை பகிர்ந்து கொள்வது மட்டுமே. இதை செய்தால் நல்லது என்று தான் சொல்லுகிறோமே ஒழிய, இதை செய் என்று யாரையும் கட்டாயப்படுத்தவில்லை.

மக்கள் ஒன்றும் நாம் சொல்லுவதை எல்லாம் நம்புபவர்கள் , என்று நினைக்கும் அளவுக்கு நான் முட்டாளுமல்ல. அவர்களை முட்டாள்களாக்குவது ஏன் நோக்கமுமல்ல.

கோவில்களோ, மசூதிகளோ , சர்ச்சோ - இன்று யாரும் செல்வதே இல்லையா? நீங்கள் ஏன் கடவுளை நம்புகிறீர்கள் என்று எப்போதாவது , யாரிடமாவது கேட்டுப் பார்த்து இருக்கிறீர்களா?

நோய்நொடி, கடன், கல்யாணம், குழந்தையின்மை , குடும்பத்தில் நிம்மதியின்மை , நம்பிக்கைத் துரோகம் - என்று ஒவ்வொருவருக்கும் ஒவ்வொரு பிரச்னைகள். புஜ பல பராக்கிரம சாலி கூட ஒன்னும் செய்ய முடியாது.

எப்போது - பிரார்த்தனைகளின் பலன்களை கண்கூடாக உணர முடியுமோ, அப்போதுதான் தெய்வ நம்பிக்கையே பிறக்கிறது. மொட்டை போடுறதும், தீ மிதிக்கிறதும், தீ சட்டி ஏந்துறதும், அலகு குத்துறதும், காவடி எடுக்கிறதும் , பால் குடம் எடுக்கிறதும் , உண்டியலில் காசு போடுவதும், கோவில் காரியங்களுக்கு காசு தருவதும் - வெறுமனே பந்தாவுக்குனு நெனைக்கிறீங்களா?

நடைமுறை வாழ்வில் - சில ஆலயங்களுக்கு சென்று, என் பிரார்த்தனை - நம்ப முடியாத அளவில் , நிறைவேறும்போது, அந்த சக்தியினால் தான் என்று என் உள் மனதுக்கு தோன்றும்போது - தெய்வம் பொய் என்று , முழுவதுமாக ஒதுக்கி வைக்க முடியவில்லை. பலப்பல இன்னல்கள் வந்தாலும், வந்த சுவடே தெரியாமல் போன போது - என் ஒருவனின் புத்தி பலத்தால் மட்டுமே என்று முட்டாள் தனமாக நம்பத் தோன்றவில்லை.

என்னைவிட அறிவு ஜீவிகளும், பலசாலிகளும் , தகுதி உள்ளவர்களும் என் கண் முன்னே இருக்கும்போது - அவர்களில் பெரும்பாலானோரைவிட - ஒரு மன நிறைவான வாழ்க்கை எனக்கு கிடைக்க , எந்த தெய்வத்தின் அருளோ, யார் செய்த புண்ணியமோ என்ற கேள்வி எனக்குள் எழுவதை தவிர்க்க முடியவில்லை.


பழுத்த மரம் தான் கல்லடி படும்.