மகனை போட்டுத் தள்ளியதந்தை, பாட்டி அதிரடி கைது

by **நேசமுடன் ஹாசிம்** Mon 19 Sep 2011 - 12:00

ஆத்தூர் அருகே மகனை கத்தியால் குத்தி கொலை செய்த கொடூர தந்தை, உடந்தையாக இருந்த பாட்டி ஆகிய இருவரையும், போலீஸார் கைது செய்தனர்.
ஆத்தூர் அருகே உள்ள பேளூர், கரடிப்பட்டி கிராமத்தை சேர்ந்தவர் கூலித்தொழிலாளி ராமசாமி (45). அவரது மகன் பிரகாஷ் (27). அவருக்கும், மேல்நாரியப்பனூரை சேர்ந்த பரமேஷ் (25) என்பவருக்கும், கடந்த இரண்டு ஆண்டுக்கு முன்பு திருமணம் நடந்தது.கர்ப்பிணி மனைவி பரமேஷிடம், குடிபோதையில் கணவர் பிரகாஷ் நாள்தோறும் தகராறு செய்து வந்துள்ளார்.

அதனால், பிரசவத்துக்கு மேல்நாரியப்பனூரில் உள்ள பெற்றோர் வீட்டுக்கு சென்ற பரமேஷ், குழந்தை பிறந்தும் கணவர் வீட்டுக்கு வராமல், அங்கேயே இருந்து வருகிறார்.இந்நிலையில், நேற்று முன்தினம் இரவு குடிபோதையில் இருந்த தந்தை ராமன், மகன் பிரகாஷ் ஆகிய இருவருக்கும் இடையே தகராறு ஏற்பட்டுள்ளது. அதையறிந்த பாட்டி வள்ளியம்மை (70), வீட்டில் இருந்த கத்தியை எடுத்து மகன் ராமசாமியிடம் கொடுத்து, பேரனை கொலை செய்யும்படி கூறியுள்ளார்.அப்போது, ராமசாமி தனது மகன் பிரகாஷை கத்தியால் குத்தியுள்ளார். பிரகாஷ் சம்பவ இடத்திலேயே பரிதாபமாக உயிரிழந்தார். தகவலறிந்த ஏத்தாப்பூர் போலீஸ் இன்ஸ்பெக்டர் (பொறுப்பு) சுரேஷ்குமார் வழக்கு பதிவு செய்து, ராமசாமி, கொலைக்கு உடந்தையாக இருந்த பாட்டி வள்ளியம்மை ஆகிய இருவரையும் கைது செய்தார்.