தமிழர் ஒருவரின் தலைமையில் பிளவுபடும் ஜேவிபி

by **இன்பத் அஹ்மத்** Wed 21 Sep 2011 - 12:34

தமிழர் ஒருவரின் தலைமையில் ஜேவிபி பிளவுபடும் நிலை ஏற்பட்டுள்ளதாக கொழும்புத் தகவல்கள் தெரிவிக்கின்றன.

ஜேவிபியின் உயர்நிலைக்குழு உறுப்பினர் பிறேம்குமார் குணரத்தினம் தலைமையிலான அணியில் ஜேவிபியின் கொழும்பு, களுத்துறை, கம்பகா மாவட்ட அமைப்பாளர்கள் இணைந்து கொண்டுள்ளனர்.

பிறேம்குமார் குணரத்தினம் 14 மாவட்டங்களில் உள்ள ஜேவிபி உறுப்பினர்களை ஒருங்கிணைத்துள்ளதாகவும் தகவல்கள் வெளியாகியுள்ளன.

இதனால், மேல் மாகாணத்தில் உள்ள பெரும்பாலான ஜேவிபி செயலகங்கள் கடந்த சில நாட்களாகவே மூடப்பட்ட நிலையில் உள்ளன.

ஜேவிபியின் மத்திய குழு உறுப்பினர்கள் பலரும் இணைந்து புதிய கட்சி ஒன்றை ஆரம்பிக்கத் திட்டமிட்டுள்ளனர்.

கடந்த திங்கட்கிழமை நடத்தப்பட்ட கூட்டம் ஒன்றிலேயே போதே இந்த முடிவு எடுக்கப்பட்டுள்ளது. புதிய கட்சியை விரைவில் தேர்தல் திணைக்களத்தில் பதிவு செய்யவும் நடவடிக்கை எடுக்கப்படவுள்ளது.

24 பேரைக் கொண்ட ஜேவிபி மத்திய குழுவில் பாதியளவிலானோர், பிளவுபடும் அணிக்கு ஆதரவாக உள்ளதாகவும் தகவல்கள் தெரிவிக்கின்றன. இந்தமாதத் தொடக்கத்தில் பிறேம்குமார் குணரத்தினம் அவுஸ்ரேலியாவில் இருந்து சிறிலங்கா திரும்பியதை அடுத்தே கட்சிக்குள் முரண்பாடுகள் ஏற்பட்டுள்ளன.

தனது சகோதரரான ஜேவிபி மூத்த உறுப்பினர் றஞ்சிதம் 1988 கிளர்ச்சியில் கொல்லப்பட்ட பின்னர் பிறேம்குமார் குணரத்தினம் அவுஸ்ரேலியாவில் தஞ்சமடைந்திருந்தார்.

தமிழரின் போராட்டத்துக்கு ஆதரவளிக்க வேண்டும் என்று பிறேம்குமார் குணரத்தினம் வலியுறுத்தி வருவதாகவும், சோமவன்ச தரப்பு அதனை நிராகரித்துள்ளதாகவும் தகவல்கள் வெளியாகியுள்ளன.

http://tamilcnn.com