ஐந்தாண்டு திட்டத்தில் பார்வை குறைபாடு போக்க அதிக நிதி: சுகாதார அதிகாரி தகவல்

""12வது ஐந்தாண்டு திட்டத்தில் பார்வை குறைபாட்டை தவிர்க்க நிதிஒதுக்கீடு அதிகரிக்கும்,'' என மத்திய சுகாதாரத்துறை இணைச் செயலாளர் சுஜலாகிருஷ்ணன் தெரிவித்தார்.மதுரை அரவிந்த் கண் ஆஸ்பத்திரியில் தென்கிழக்கு ஆசியாவில் உள்ள 11 நாடுகளின் சுகாதாரத் துறை அதிகாரிகளின் கூட்டம் 3 நாட்கள் நடந்தது. உலக
சுகாதார மையத்தின் "விஷன் 2020' திட்டம் குறித்து கலந்துரையாடினர். வங்கதேச தேசிய கண்மருத்துவ நிறுவன இயக்குனர் தீன்முகமது, உலக சுகாதார மைய முன்னாள் கண் பாதுகாப்பு ஆலோசகர் பரராஜசேகரம்(இலங்கை), உலக சுகாதார அமைப்பு திட்ட மேலாளர் சாராவர்க்கீஸ், அரவிந்த் கண் ஆஸ்பத்திரி இயக்குனர் துளசிராஜ், நேபாளம், இந்தோனேஷியா, மாலத்தீவு உட்பட பல நாட்டு பிரதிநிதிகள் கலந்து கொண்டனர். மத்திய சுகாதாரத்துறை இணை செயலாளர் சுஜலாகிருஷ்ணன் கூறியதாவது: இந்தியாவில் பார்வை குறைபாட்டை போக்க 10வது ஐந்தாண்டு திட்டத்தில் ரூ. 450 கோடி, 11வது திட்டத்தில் ரூ. 1250 கோடி செலவிடப்பட்டது. 12வது ஐந்தாண்டு திட்டத்தில் இருமடங்காக அதிகரிக்கப்படும்.பார்வை இழப்பால் சமூக, பொருளாதார பாதிப்பு ஏற்படுகிறது. குழந்தைப் பருவம் முதல் பார்வை குறைபாட்டை கண்காணித்து, விழிப்புணர்வு ஏற்படுத்தப்படும்.
இந்தியாவில் தேசிய அளவில் ஒரு சதவீதம் பேர் பார்வை குறைபாடு பாதிப்பில் உள்ளனர். இதை 0.3 சதவீதமாக குறைப்பதே திட்டத்தின் நோக்கம். இந்தியாவில் ஆண்டுக்கு 60 லட்சம் கண்புரை அறுவை சிகிச்சை செய்யப்படுகிறது. இதில் தமிழகம், கேரள மாநிலங்கள் முன்மாதிரியாக உள்ளன. பொது சுகாதாரம் தொடர்பாக 100 மாநிலங்கள் தேர்ந்தெடுத்து திட்டம் செயல்படுத்தப்படுகிறது, என்றார்.