கடையில் ரூபாய் நோட்டு விற்பனை .....

கோவை: 1,000, 500 மற்றும் 100 மதிப்பிலான போலி ரூபாய் நோட்டுகள், பெட்டிக் கடை தோறும் அதிகளவில் விற்கப்படுகின்றன. கள்ள நோட்டு தடுப்புக்கான இந்திய ரிசர்வ் வங்கியின் கட்டுப்பாடுகளை மீறி, ஒரிஜினல் நோட்டுகளை போன்றே அச்சு அசலாக போலி ரூபாய் நோட்டுகள், தனியார் அச்சகங்களில் அச்சிடப்படுகின்றன.
வெளிநாடுகளில் மறைமுகமாக அச்சிடப்படும் 1,000, 500, 100 ரூபாய் இந்திய கள்ள நோட்டுகள், இந்தியாவுக்கு கடத்தி வரப்பட்டு புழக்கத்தில் விடப்படுகின்றன. இவற்றின் ஊடுருவலை தடுக்க மத்திய, மாநில புலனாய்வு துறைகளும், காவல்துறையினரும் மேற்கொள்ளும் முயற்சிகள் எடுபடுவதில்லை. இந்தியாவின் வடகிழக்கு மாநிலங்களிலும், தென் மாநிலங்களிலும் கடந்த ஓராண்டில் மட்டும் 100 கோடி ரூபாய் மதிப்பிலான கள்ள நோட்டுகள் பிடிபட்டுள்ளன. தமிழகத்திலும் 1,000 மற்றும் 500 ரூபாய் கள்ள நோட்டுகளின் புழக்கம் சமீப காலமாக அதிகரித்துள்ளது. கோவை, திருப்பூர் மாவட்டங்களில் நடப்பாண்டில் காவல்துறையினர் நடத்திய சோதனைகளில், பல லட்சம் ரூபாய் கள்ள நோட்டுகள் கட்டுக்கட்டாக பிடிபட்டுள்ளன.

இந்நிலையில், குழந்தைகளுக்கான விளையாட்டு நோட்டுகள் (சில்ரன்ஸ் பாங்க் சர்வீஸ்) என்ற பெயரில் 1,000, 500 மற்றும் 100 மதிப்பிலான போலி ரூபாய் நோட்டுகள், கிரிக்கெட் உள்ளிட்ட பல்வேறு விளையாட்டு வீரர்களின் படத்துடன் அச்சிடப்பட்டு, தமிழகத்தில் பெட்டிக் கடை தோறும் விற்கப்படுகின்றன. இவை, சிறுவர்களுக்கான விளையாட்டு நோட்டு என குறிப்பிடப்பட்டிருந்தாலும், பார்ப்பதற்கு அசல் ரூபாய் நோட்டுகளை போலவே உள்ளன. ஒரிஜினல் ரூபாய் நோட்டுகளின் நீளம், அகலம் அப்படியே ஒத்துப் போகின்றன. ஒரிஜினல் கரன்சி நோட்டை, "ஸ்கேன்' செய்து, அதன் ஒரு பகுதியில் மட்டும் விளையாட்டு வீரர்களின் படங்களை அச்சிட்டுள்ளனர். மூன்று அல்லது நான்கு போலி ரூபாய் நோட்டுகளுடன், இரு மிட்டாய்களை வைத்து பாலித்தீன் கவரில் அடைத்து கடைகளில் விற்கின்றனர்; இதன் விலை ஒரு ரூபாய் மட்டுமே.

இவ்வளவு துல்லியமாக போலி ரூபாய் நோட்டுகளை அச்சிட்டு விற்பனை செய்யும் நபர்கள், ஒரிஜினல் நோட்டு போன்றே கள்ள நோட்டுகளை அச்சிடும் அபாயமும் உள்ளது. இது போன்ற போலி ரூபாய் நோட்டுகளுக்கு மத்திய, மாநில அரசுகள் தடை விதிப்பதுடன், அச்சிடுவோர் மீது கடும் நடவடிக்கை மேற்கொள்வதும் அவசியம் என்கின்றனர் காவல்துறையினர். இந்திய ரூபாய் நோட்டுகளை அப்படியே "ஸ்கேன்' செய்து அச்சிடுவது, கலர் ஜெராக்ஸ் எடுப்பது, நோட்டுகளில் சிறு, சிறு மாற்றங்களை செய்து விளையாட்டுக்காக அச்சிடுவது, இந்திய ரிசர்வ் வங்கியின் விதிமுறைகளுக்கு எதிரானது. இச்செயலில் ஈடுபடுவோர் மீது கிரிமினல் நடவடிக்கை மேற்கொள்ளவும் சட்டத்தில் இடமுள்ளது. சிறுவர்களுக்கான விளையாட்டு ரூபாய் நோட்டுகள் என்ற பெயரில் போலி ரூபாய் நோட்டுகளை அச்சிடுவதும், விற்பனை செய்வதும் குற்றமாகும்.இது போன்ற செயல்கள் அதிகரித்துள்ளதாக எங்களுக்கு தகவல்கள் கிடைத்துள்ளன. இதனால், பள்ளிகள் முன்புள்ள கடைகளை கண்காணித்து வருகிறோம்.

மேலும் போலி ரூபாய் நோட்டுகளை சில்லரை முறையில் விற்போரை பிடித்து, மொத்த வியாபாரிகள் மற்றும் அச்சிடுவோரை பிடிக்கவும் நடவடிக்கைகள் மேற்கொள்ளப்பட்டுள்ளன என்று கோவை மாநகர காவல் குற்றப்பிரிவு உதவி ஆணையர் கூறினார்.