ஆசிரியர்களின் அக்கறையின்மையால் பிஞ்சிலே கருகிய பிள்ளை!

நவராத்திரி விழாவை நயினாதீவில் கொண்டாடுவதற்காக யாழ்ப்பாணம் இந்துக் கல்லூரியிலிருந்து சென்ற இளம் பிஞ்சு கருகி விட்டதான செய்தி அனைவரினது நெஞ்சையும் அடைத்து நிற்கின்றது.

காலாதி காலமாகச் சிங்களவன் குண்டினால் சிதைக்கப்பட்டது எம்மின உறவுகளின் உயிர்கள். அதிலிருந்து இன்னும் மீளாதிருக்கும் எம்மை மீண்டும் இவ்வாறான சம்பவங்கள் சோகத்தின் உச்சியில் கொண்டுபோய் விடுகின்றது.

இந்தப் பிஞ்சைக் காயாக்கி, காயைக் கனியாக்கி கட்டியணைக்கும் காலம் வரைக் காத்திருந்த பெற்றோர்களின் துன்பத்தை அளக்க கருவியோ, ஆற்றுவதற்கு விலையோ இல்லை.

அந்தப் பிஞ்சைக் கருக்கி, துன்பத்தைத் தந்தது ஆசிரியர்களின் அக்கறையின்மையே என்னும் போது எம் நெஞ்சு வெடிக்கின்றது.

எது எவ்வாறாக இருந்தாலும் பெற்றோர்களிடம் இருக்கும் நேரத்தை விடப் பிள்ளைகள் ஆசிரியர்களிடம் இருக்கும் நேரம் அதிகம்.

எனவே அவர்களுக்குப் பெற்றோர்களாகவும், ஆசானாகவும் இருக்க வேண்டியது ஆசிரியர்களின் கட்டாய தேவையாகும்.

அதிலும் சிறுவயதுப் பிள்ளைகள் எனும் போது சுட்டித்தனம் மிக்கவர்கள் என்பது யாவரும் அறிந்த ஒன்று.

எனவே அவர்களின் பாதுகாப்பை உறுதிப்படுத்திக் கொள்வது ஆசிரியர்களின் பொறுப்பாகும். இவ்வாறானதொரு பொறுப்புமிக்கவர்கள் தமது பொறுப்புக்களிலிருந்து விலகி பிஞ்சு உள்ளங்களின் உயிர்கள் பிரிவதற்குக் காரணமாக இருப்பதென்பது மன்னிக்க முடியாத குற்றம்.

இதேவேளை பந்து ஒன்று வீதியில் உருண்டு வருவதைக் கண்டால் வாகனத்தை நிறுத்துமாறு கூறப்படுகின்றது.

ஏனெனில் அந்தப் பந்துக்குப் பின்னால் எப்படியும் ஒரு சிறுபிள்ளை ஓடி வரும் என்பதற்காக. எனவே மேற்படி பேருந்தை ஓட்டிய சாரதியின் கவனக் குறைவும் இப் பிள்ளையின் உயிர் பிரிந்ததற்குக் காரணமாகும்.

எனவே இனிமேலாவது விபத்துக்களின் மூலம் மனித உயிர்கள் காவு கொள்ளப்படுவதை இயன்றவரை தடுத்து அக்கறையுடன் செயற்படுவது காலத்தின் தேவையாகும்.

அனுதாபங்கள் குழந்தைகளுக்காக

சாரதிகளின் கவனக்குறைவில் அதிகமான விபத்துக்கள் அதிகரித்திருக்கிறது ஒவ்வொரு சம்பவத்துடன் மறந்தும் விடுவார்கள் கவனம் தேவை அதிகம்

பகிர்வுக்கு நன்றி சார்

காட்சியும் செய்தியும் மிகவும் கவலைக்குரியதாக உள்ளது :!#: