ஹினா வின் அமெரிக்க எதிர்ப்பு கருத்துக்கு கிலானி கண்டனம்

அமெரிக்காவுக்கு எதிரான கருத்து தெரிவித்த பாகிஸ்தானின் வெளியுறவுத்துறை அமைச்சருக்கு பாகிஸ்தான் பிரதமர் கிலானி கடும் கண்டனம் தெரிவித்துள்ளார். மேலும் அவரை உடனடியாக அமெரிக்காவிலிருந்து நாடு திரும்ப உத்தரவிட்டு்ள்ளார்
அமெரிக்காவின் நியுயார்க் நகரத்தில் ஐ.நா. சபையின் பொதுக் கூட்டம் நடைபெறுகிறது. இதில் பங்கேற்பதற்காக பாகிஸ்தானின் சார்பில் அதன் வெளியுறவு அமைச்சர் ஹினா ரப்பானி கர் சென்றுள்ளார். அங்கு அவர் ஒரு தொலைக்காட்சி சேனலுக்கு பேட்டி அளிக்கும்போது பாகிஸ்தான் மீது அமெரிக்கா தொடர்ச்சியாக ஆதாரமற்ற குற்றச்சாட்டுகளைக் கூறி வருவதாகவும் இவ்வாறு தொடர்ந்தால் அமெரிக்கா அதன் கூட்டாளியை இழக்க நேரிடலாம் என அமெரிக்காவைச் சாடி பேசினார். குழந்தைகளுக்கு பள்ளிக்கூட வசதிகளை கொடுக்க முடியாமல் போருக்கென அதிகளவு நிதி ஒதுக்கீடு செய்வதையும் அவர் வேதனையுடன் சுட்டிக்காட்டினார். அமெரிக்க முப்படை தளபதியான அட்மிரல் முல்லர் பாகிஸ்தானின் உளவுத்துறையான ஐ.எஸ்.ஐ.க்கு தீவிரவாதிகளுடன் தொடர்பு இருப்பதாக குற்றம் சாட்டியதற்கு பதில் அளிக்கும் விதமாக ஹினா இவ்வாறு தெரிவித்திருந்தார்.

ஹினா ரப்பானி கரின் உரை அமெரிக்காவில் எதிர்ப்பலைகளை ஏற்படுத்தியுள்ளது. பெண்டகனின் செய்தித் தொடர்பாளர் அமெரிக்காவுக்கும் பாகிஸ்தானுக்கும் கருத்து வேறுபாடுகள் இருந்தாலும் தீவிரவாத எதிர்ப்பு விசயத்தில் இரு நாடுகளும் இணைத்து செயல்பட வேண்டியது அவசியம் என தெரிவித்தார்.

ஹினா ரப்பானியின் கருத்துக்கு பாகிஸ்தான் பிரதமர் கிலானியும் எதிர்ப்பு தெரிவித்துள்ளார். ஹினா ரப்பானியை நாடு திரும்பவும் கிலானி உத்தரவிட்டுள்ளார். எனவே அவர் நாளை (செவ்வாய்) ஐ.நா.சபையில் உரை நிகழ்த்தியதும் பாகிஸ்தான் திரும்புகிறார். அவர் பேசியது சம்பந்தமாக இஸ்லாமாபாத் திரும்பியதும் அவரிடம் விளக்கம் கேட்கப்படும் எனத் தெரிகிறது.