ஜனாதிபதி முன்னிலையில் விடுவிக்கப்பட்ட முன்னாள் போராளிகளுக்கு நடந்தது என்ன?

புனர்வாழ்வளிக்கப்பட்டு நேற்றுமுன்தினம் வெள்ளிக்கிழமை விடுவிக்கப்பட்டுள்ளதாகக் கூறப்படும் ஆயிரத்து 800 பேர் தங்களது வீடுகளுக்குச் செல்வதற்கு இன்னும் அனுமதி வழங்கப்படவில்லை என்று தெரிவிக்கப்பட்டுள்ளது. புனர்வாழ்வளிக்கப்பட்டு சமூகத்தில் இணைக்கப்படுவதற்காக விடுதலைப்புலிகள் அமைப்பில் சேர்ந்திருந்த, 1800 பேர் நேற்றுமுன்தினம் ஜனாதிபதி மகிந்த ராஜபக்சவின் முன்னிலையில் வைபவரீதியாக விடுதலை செய்யப்பட்டிருந்தார்கள்.

இவ்வாறு வைபவரீதியான நிகழ்வு இடம்பெற்றிருந்தாலும் கூட அவர்கள் இதுவரையில் பெற்றோர்களிடம் ஒப்படைக்கப்படவில்லை எனத் தெரியவருகின்றது. பிள்ளைகளைப் பொறுப்பேற்பதற்காக கடந்த 30 ஆம் திகதி வெள்ளிக்கிழமை வவுனியாவிலிருந்து கொழும்புக்கு மேற்படி நிகழ்விற்காக வந்த பெற்றோர்கள் பெரிதும் ஏமாற்றத்துடன் திரும்பிச் சென்றுள்ளதாகத் தெரிய வருகின்றது.

இந்நிலையில் இது தொடர்பில், புனர்வாழ்வு மற்றும் சிறைச்சாலைகள் மறுசீரமைப்பு அமைச்சின் சிரேஷ்ட ஆலோசகர் எஸ். சதீஸ்குமாரிடம் கேட்கப்பட்டபோது, கடந்த வெள்ளிக்கிழமை இடம்பெற்ற வைபவத்தின்போது, ஆயிரத்து 800 பேரின் விடுதலை குறித்து ஜனாதிபதி உத்தியோகபூர்வமாக அறிவித்துள்ளார். விடுதலை செய்யப்படுவதாக அறிவிக்கப்பட்ட அனைவரும் ஒக்டோபர் 3 ஆம் 4 ஆம் திகதிகளில் அவர்கள் தங்க வைக்கப்பட்டுள்ள புனர்வாழ்வு நிலையங்களில் வைத்து பெற்றோர்களிடம் ஒப்படைக்கப்படுவார்கள்.

புனர்வாழ்வு நிலையங்களில் பயற்சி பெற்றுள்ளவர்களுக்கு விடுதலை செய்யப்பட்டுள்ளதற்கான அத்தாட்சிக் கடிதம் மற்றும் மருத்துவ சான்றிதழ்கள் வழங்கப்பட வேண்டும்.

இந்த ஆவணங்கள் தயார் செய்யப்பட்டுள்ள நிலையில் உரிய அதிகாரிகள் இதனைக் கையளிப்பார்கள் இதன் பின்னர் இன்னும் இரு தினங்களில் அவர்கள் தங்களது பெற்றோர்களிடம் ஒப்படைக்கப்படுவார்கள் என்றும் அவர் மேலும் தெரிவித்தார்.

நல்ல படியாக ஒப்படைத்தால் சரிதான்.