யானையை வைத்து பயணிகளை மிரட்டிய யானை பாகன்!

தூத்துக்குடி புதிய பேருந்து நிலையத்தில் பயணிகளிடம் யானையை வைத்து மிரட்டி பணம் வசூலிக்கும் சம்பவம் தொடர் கதையாகி உள்ளது.

தூத்துக்குடியில் புதிய பேருந்து நிலையத்தில் யானை பாகன் ஒருவர் தனது யானையுடன் உள்ளே நுழைந்தார். அங்கு பயணிகள் அமருவதற்காக உள்ள வெயிட்டிங் அறைக்கு யானையைப் பாகன் கூட்டி வந்து அங்கிருந்த பயணிகளிடம் வசூலை ஆரம்பித்தார்.

இதனைச் சற்றும் எதிர் பாராத பயணிகள் பயந்து போய் கையில் எவ்வளவு வருகிறதோ அனைத்தையும் கொடுத்தனர். புதிய பேருந்து நிலையத்தில் உள்ள பயணிகள் இருக்கை அறை, பேருந்து நிற்கும் இடம் என யானை செல்ல முடியாத இடங்களில் கூட பாகனின் கடும் துன்புறுத்தல்களால் யானை செல்ல நேர்ந்தது.

மேலும், இதுபோன்று யானை பாகன்கள் கடைகள், வணிக நிறுவனங்களுக்கு அவற்றை அழைத்துச் சென்று பணம் வசூலிக்கின்றனர். உரசும் விதமாக பேருந்துகள் அருகே சென்று அவற்றின் ஜன்னல் வழியாக துதிக்கையை யானை நுழைக்கிறது. இதனை எதிர்பாராத பயணிகள் பயத்தில் அலறுகின்றனர்.

சில நேரங்களில் திடீரென சாலையில் செல்லும் வாகனங்களுக்கு அருகில் வந்து நிற்பதால் அதில் பயணம் செய்பவர்கள் அச்சப்படும் நிலை உள்ளது. கடைவீதிகளுக்குள் யானைகள் சென்று விட்டால் வியாபாரிகள் காய்கறிகள், பழங்கள் என விற்பனை பொருட்களைக் கட்டாயம் கொடுக்க வேண்டிய நிலை ஏற்படுகிறது.

தற்போது நவராத்திரி விழாவிற்காக பல்வேறு பகுதிகளிலிருந்து யானைகள் தூத்துக்குடி கோவில்களுக்கு அழைத்து வரப்பட்டுள்ளன. இந்த யானைகளைப் பயன்படுத்தி பாகன்கள் வசூல் வேட்டையில் ஈடுபட்டு வருகின்றனர். யானைகளைத் துன்புறுத்தி, பொதுமக்களுக்கும் அச்சுறுத்தலை ஏற்படுத்தி பணம் வசூலிப்பவர்கள் மீது சம்பந்தபட்ட அதிகாரிகள் கடும் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.