சிவாஜி பிறந்தநாளையொட்டி ரஷிய படவிழாவில் “தில்லானா மோகனாம்பாள்”

ரஷியாவில் நடைபெறும் சர்வதேச தமிழ் திரைப்பட விழாவில் சிவாஜிகணேசன்,
பத்மினி ஜோடியாக நடித்த “தில்லானா மோகனாம்பாள்” படம் திரையிடப்படுகிறது.
“தில்லானா மோகனாம்பாள்” படத்தில் சிவாஜியின் சிக்கல் சண்முகசுந்தரம்
மற்றும் பத்மினியின் மோகனாம்பாள் கேரக்டர்கள் அக்கால கட்டத்தில் ரசிகர்களை
மிகவும் கவர்ந்தன.

அப்படத்தில் இடம்பெறும்
“நலம்தானா நலம்தானா உடலும் உள்ளமும் நலம் தானா”, “மறைந்திருந்து பார்க்கும்
மர்மம் என்ன” பாடல்கள் பட்டி தொட்டி எங்கும் கலக்கின. இன்றும் “தில்லானா
மோகனாம்பாள்” கிராமப்புற தியேட்டர்களில் திரையிடப்பட்டு வருகிறது. சிவாஜி
பிறந்த நாளை யொட்டி அவரை கவுரவிக்கும் வகையில் ரஷியாவின் உக்ளிக் நகரில்
அடுத்த மாதம் (நவம்பர் ) நடைபெறும் சர்வதேச தமிழ் திரைப்பட விழாவில்
திரையிடப் படுகிறது.

நான்கு நாட்கள் நடை பெறும்
இத்திரைப்பட விழாவை ரஷிய அரசு, இந்திய-சோவியத் வர்த்தக சபை இணைந்து
நடத்துகின்றன. இதே திரைப்பட விழாவில் கோ, சிவாஜி, சந்திரமுகி, தென்மேற்கு
பருவக்காற்று, பாஸ் என்கிற பாஸ்கரன், அங்காடிதெரு போன்ற படங்களும்
திரையிடப்படுகின்றன. வருகிற 19-ந்தேதி உஸ்பெஸ்கிஸ்தானில் தமிழ் திரைப்பட
விழா நடக்கிறது. இதில் “கோ,” தெய்வத் திருமகள், பேராண்மை படங்கள்
திரையிடப்பட உள்ளன.