பீரங்கிகளை ஏற்றி அப்பாவிகளைக் கொன்ற எகிப்து ராணுவம் : இறுதிச் சடங்கில் மக்கள் கொந்தளிப்பு

எகிப்தில், கிறிஸ்தவர்களுக்கும் ராணுவத்துக்கும் இடையில் நடந்த மோதலில் பலியானோரின் இறுதிச் சடங்குகளில் ஆயிரக்கணக்கானோர் கலந்து கொண்டு ராணுவத்துக்கு எதிராக கோஷம் எழுப்பினர். மூன்று நாட்கள் உண்ணாவிரதம் மற்றும் பிரார்த்தனைகளுக்கு காப்டிக் போப் அழைப்பு விடுத்துள்ளார். எகிப்தின் தென்பகுதியில் உள்ள அஸ்வான் மாகாணத்தில் ஒரு சர்ச் முஸ்லிம்களால் தீக்கிரையாக்கப்பட்டது. இதைக் கண்டித்து தலைநகர் கெய்ரோவில் உள்ள தாரிர் சதுக்கத்தில் கடந்த 9ம் தேதி கிறிஸ்தவர்களால் மாபெரும் பேரணி நடத்தப்பட்டது.

மக்கள் மீது ஏறிய பீரங்கிகள்: பேரணியை கலைப்பதற்காக அதில் ஈடுபட்டவர்கள் மீது ராணுவம் பீரங்ககளை ஏற்றியது. கண்மூடித் தனமாக மக்கள் மீது துப்பாக்கிச் சூடு நடத்தப்பட்டது. இதில் இருதரப்புக்கும் ஏற்பட்ட மோதலில் 25 பேர் பலியாயினர். நேற்று முன்தினமும் இருதரப்புக்கும் மோதல் தொடர்ந்தது. இதில் 200க்கும் மேற்பட்டோர் காயம் அடைந்தனர். நேற்று முன்தினம் மாலை முதல் பலியானோரின் இறுதிச் சடங்குகள் கெய்ரோவில் நடந்தன. அதில் ஆயிரக்கணக்கானோர் கலந்து கொண்டு, ராணுவத்துக்கு எதிராக கோஷமிட்டனர். ராணுவ ஆட்சித் தலைவர் முகமது உசேன் டன்டாவி பதவி விலகக் கோரி வலியுறுத்தினர்.

நம்பிக்கை இல்லை: எகிப்திய காப்டிக் சர்ச், ராணுவ வன்முறையைக் கடுமையாகக் கண்டித்துள்ளது. மூன்று நாட்கள் தொடர் உண்ணாவிரதம் மற்றும் பிரார்த்தனைகள் நாடு முழுவதும் நடக்க வேண்டும் என அழைப்பு விடுத்துள்ள காப்டிக் போப் மூன்றாம் ஷெனுடா,"ராணுவத்தின் மீதான நம்பிக்கையை நாங்கள் இழந்து விட்டோம். பேரணியில் ஊடுருவிய கூலிப்படையினர் நடத்திய வன்முறைகளுக்கு எங்களைக் குற்றம்சாட்டுகின்றனர். கிறிஸ்தவர்கள் மீது தாக்குதல் நடத்த ராணுவம் தொடர்ந்து அனுமதி அளித்து வருகிறது' எனக் குற்றம்சாட்டியுள்ளார்.

தடயவியல் அறிக்கை: சம்பவம் நடந்த இடங்களில் நடத்தப்பட்ட தடயவியல் ஆய்வில் பலியானோரில் பெரும்பாலோர், பீரங்கிகளால் நசுக்கப்பட்டும், பலர் துப்பாக்கிக் குண்டுகளாலும் உயிரிழந்துள்ளதாகத் தெரிவிக்கப்பட்டுள்ளது. பீரங்கிகள் ஏவப்படும் முன், கூலிப்படையினர் தங்களைக் கடுமையாகத் தாக்கியதாக ஆர்ப்பாட்டக்காரர்கள் கூறியுள்ளனர். இனி மேலும் போராட்டங்கள் நடக்குமானால் கடுமையான நடவடிக்கை எடுக்கப்படும் என ராணுவம் எச்சரித்துள்ளது. நவம்பர் 28ம் தேதி, அந்நாட்டில் அதிபர் தேர்தல் நடக்க உள்ள நிலையில் இந்தக் கொடூர சம்பவம் நிகழ்ந்துள்ளது, ராணுவத்தின் மீதான மக்களின் நம்பிக்கையைக் கேள்விக்குள்ளாக்கியுள்ளது.

எகிப்தில் அமைதியாக இருந்த ஹுஷ்னியை விரட்டியது இவர்கள்தான் இப்போது படுகிறார்கள் படட்டும்

அவரும் அதிகம் பிழைசெய்திருக்கிறார் அதனால்தான் மக்களால் விரட்டப்பட்டிருக்கிறார்கள்