துமிந்த சில்வாவிற்கு சிங்கப்பூரில் சிகிச்சையளிக்க நடவடிக்கை

முல்லேரியா துப்பாக்கிச் சூட்டுச் சம்பவத்தில் காயமடைந்து ஸ்ரீ ஜயவர்த்தனபுர வைத்தியசாலையில் சிகிச்சை பெற்றுவரும் கொழும்பு மாவட்ட நாடாளுமன்ற உறுப்பினர் துமிந்த சில்வாவுக்கு வெளிநாடொன்றில் சிகிச்சையளிப்பதற்கான ஏற்பாடுகள் நடைபெறுகின்றன என அரசதரப்பு வட்டாரங்கள் நேற்றுத் தெரிவித்தன.

துமிந்த சில்வாவுக்குத் தற்போது சிகிச்சையளித்துவரும் விசேட மருத்துவர்கள் செய்த சிபார்சுக்கமையவே இந்த ஏற்பாடுகள் மேற்கொள்ளப்படுவதாகத் தெரிகிறது.

பெரும்பாலும் சிங்கப்பூரில் மவுண்ட் எலிஸபெத் வைத்தியசாலைக்குத் துமிந்த சில்வாவை மேலதிக சிகிச்சைக்காக அனுப்புவதற்குத் தீர்மானிக்கப்படலாமென்றும் அரச தரப்பு வட்டாரங்கள் மேலும் தெரிவித்தன.

இதேவேளை, வைத்தியசாலையின் அதி தீவிர சிகிச்சைப் பிரிவில் சிகிச்சை பெற்றுவரும் துமிந்த சில்வாவின் உடல் நிலையில் முன்னேற்றமில்லையென்று தெரிகிறது.

மூளையின் செயற்பாடுகள் செயற்கையாக இடம்பெறுவதாலும், துமிந்த இன்னும் மயக்கமடைந்த நிலையில் இருப்பதாலும், சரியான முடிவுக்கு வரமுடியாத நிலைமை இருப்பதாக மருத்துவர்கள் தெரிவித்திருக்கின்றனர்.

அவரது உடல் நிலையில் நரம்பியல் ரீதியான உணர்வுகள் ஏற்பட்டுள்ளதாகவும், செயற்கை சுவாச இயந்திரம் அகற்றப்பட்டு, தற்போது இயற்கையாக சுவாசித்து வருவதாகவும் ஸ்ரீஜயவர்தனபுர வைத்தியசாலை மருத்துவர்கள் தெரிவித்துள்ள போதிலும், அவரை வெளிநாட்டுக்கு அனுப்பி சிகிச்சை அளிக்கும் அளவிற்கு அவரது உடல்நிலையில் இன்னமும் மாற்றம் ஏற்படவில்லை என குறிப்பிட்டுள்ளனர்.

இதேவேளை, துமிந்த சில்வா எம்.பியை பார்வையிட ஒரு சிலருக்கு மட்டுமே அனுமதி வழங்கப்பட்டுள்ளது எனத் தெரிவிக்கப்படுகிறது.

நல்லவராக இருந்தால் மக்களின் பிராத்தனைகளே இவரைக் குணப்படுத்தும் தகவலுக்கு நன்றி