இந்தியா வளம் பெற அனைத்து நதிகளையும் இணைக்க வேண்டும்: முன்னாள் ஜனாதிபதி அப்துல்கலாம் பேச்சு

கோவை பசும்புலரி, சிறுதுளி, ராக் ஆகிய அமைப்புகளின் சார்பில் கோவையை
அடுத்த நண்டங்கரை தடுப்பணை பகுதியில் முன்னாள் ஜனாதிபதி அப்துல்கலாமின்
80-வது பிறந்தநாள் விழா பசுமை பொன்னாடை விழாவாக கொண்டாடப்பட்டது. இந்த
நிகழ்ச்சியில் அப்துல்கலாம் சிறப்பு விருந்தினராக கலந்து கொண்டு பள்ளி
மாணவர்கள் மற்றும் விவசாயிகளுடன் கலந்துரையாடினார்.

அப்போது
அவர் பிறந்தநாள் `கேக்' வெட்டினார். அதைத் தொடர்ந்து `கலாம் வனம்' என்று
பெயரிடப்பட்ட பகுதியில் அவர் தனது 80 வயதை குறிக்கும் வகையில் 80
மரக்கன்றுகளை நட்டார். அப்போது அவரிடம் கூடங்குளம் அணுமின்சார
நிலையத்துக்கு எதிராக நடந்து வரும் போராட்டம் குறித்து நீங்கள் கருத்து
எதுவும் தெரிவிக்கவில்லையேப என்று கேட்கப்பட்டது.

அதற்கு அப்துல் கலாம் பதில் அளித்து கூறியதாவது:-

அணுமின்
நிலையம் அமைக்கும்போது அதன் பாதுகாப்புக்கு முக்கியத்துவம் கொடுத்துதான்
அமைக்கப்படுகிறது. அணு மின்சார நிலையங்கள் சுற்றுப்புற சூழலுக்கு பாதிப்பு
ஏற்படுத்தாத கிரீன் பிளான்ட் ஆகும். தற்போது கூடங்குளம் அணுமின் நிலைய
பாதுகாப்பு குறித்து மக்கள் போராட்டம் நடத்தி வருகிறார்கள்.

இதன்
எதிரொலியாக இந்தியாவில் கடலோரப் பகுதியில் அமைந்துள்ள அனைத்து அணுமின்
நிலையங்களுக்கும் இன்னும் 10 நாட்களில் நான் நேரில் சென்று ஆய்வு நடத்த
உள்ளேன். அங்குள்ள விஞ்ஞானிகளுடன் அணுமின் நிலையங்களில் செய்யப்பட்டுள்ள
பாதுகாப்பு ஏற்பாடுகள் குறித்து ஆலோசனை நடத்துவேன். அதன் பின்னர் அணுமின்
நிலைய பாதுகாப்பு குறித்து எனது கருத்தை தெரிவிப்பேன்.

இவ்வாறு அப்துல்கலாம் கூறினார்.

அதன் பின்னர் அங்கு கூடியிருந்த மாணவர்கள் மற்றும் விவசாயிகளிடையே அப்துல்கலாம் பேசியதாவது:-

மாணவர்களுக்கு
உயர்ந்த லட்சியம் இருத்தல் வேண்டும். மருத்துவர், பொறியாளர், ஐ.ஏ.எஸ்.
அதிகாரி, கவிஞர், ஆசிரியர் ஆக வேண்டும் என்பது போல ஒரு லட்சியத்தை நோக்கி
பயணிக்க வேண்டும். வானில் உயர பறக்க வேண்டும். நிலாவில், செவ்வாய்
கிரகத்தில் நடக்க வேண்டும் என்பது போன்ற லட்சியங்கள் வேண்டும். உயர்ந்த
லட்சியம் அதனை அடைய தேவையான அறிவாற்றலை தேடிபெறுவது, விடா முயற்சி, கடின
உழைப்பு இவை இருந்தால் நீ எந்த சூழ்நிலையில் இருந்து வந்தாலும் சாதிக்க
முடியும். மாணவர்கள் நாட்டிற்கும் சேவையாற்ற வேண்டும்.

நாடு
வளம் பெற சுற்றுசூழல் மேம்பட 100 கோடி மரக்கன்று நட்டு வளர்ப்பது
முக்கியம். இதற்கு நாட்டு மக்கள் ஒவ்வொருவரும் உறுதிமொழி ஏற்க வேண்டும்.
பசும்புலரி இயக்கம் ஒரு ஆண்டில் ஒரு லட்சம் மரக்கன்று நட்டு வளர்க்கும்
முயற்சியில் இறங்கி இருப்பதற்கு பாராட்டுகிறேன். விவசாயிகளின்
விளைபொருளுக்கு நல்ல விலை கிடைக்க வேண்டும். அதற்கு அனைத்து தரப்பினரும்
ஆவன செய்ய வேண்டும்.

அனைத்து விவசாயிகளுக்கும்
பாசனத்திற்கு தேவையான தண்ணீர் கிடைக்க நதிகளை இணைப்பதே சிறந்த வழி. இந்தியா
வளம் பெற அனைத்து நதிகளையும் இணைக்க வேண்டும். அந்த லட்சியத்தை அடைய
நம்மால் முடியும். உணவு தேடி யானைகள் நாட்டுக்குள் வந்தால் யானைகள்
அட்டகாசம் செய்கின்றன என்று கூறுகிறோம்.

வனங்கள்
அழிக்கப்படுவதால்தான் யானைகள் ஊருக்குள் ஊடுருவுகின்றன. எனவே காடுகள்
அழிக்கப்படுவது நிறுத்தப்பட வேண்டும். மாறாக ஆளுக்கொரு மரம் நட்டு வளர்க்க
வேண்டும். இவ்வாறு அப்துல்கலாம் பேசினார். விழாவில் அப்துல் கலாமின் 80-வது
பிறந்தநாளையொட்டி இலைகளால் நெய்யப்பட்ட பச்சை பொன்னாடை அவருக்கு
அணிவிக்கப்பட்டது. அதைத் தொடர்ந்து பச்சை பட்டு இழைகளால் அவரது உருவம்
பொறிக்கப்பட்ட கேடயம் பரிசாக வழங்கப்பட்டது. இந்த விழாவில் 3 ஆயிரம்
மாணவர்கள் மற்றும் விவசாயிகள் பச்சை குடை பிடித்து விழாவில் பங்கேற்றனர்.

ஏதாவது நடக்ககூடிய காரியமாக முன்னால் ஜனாதிபதி பேசக் கூடாதா

jasmin wrote:ஏதாவது நடக்ககூடிய காரியமாக முன்னால் ஜனாதிபதி பேசக் கூடாதா

:#: :#: