கூடங்குளம் அணு மின் நிலையத்தில் பாதுகாப்பை ஆய்வு செய்தபின் பணிகளை மேற்கொள்ளலாம்: கருணாநிதி கருத்து

தி.மு.க. தலைவர் கருணாநிதி நேற்று நிருபர்களுக்கு பேட்டி அளித்தார். அதன் விவரம் வருமாறு:-

கேள்வி:-
உள்ளாட்சித் தேர்தல்களில் அனைத்து எதிர்க்கட்சிகளும், இந்தத் தேர்தல்
முறையாக நடக்கவில்லை என்று சொல்லியிருக்கிறார்கள். எனவே அனைத்து
எதிர்க்கட்சிகளும் சேர்ந்து ஏதாவது செய்யப் போகிறீர்களா?

பதில்:-
எங்களைப் பொறுத்தவரையில் நாங்கள் நீதி மன்றத்திற்குச் செல்வதற்கு முன்பு
தேர்தல் ஆணையரைச் சந்தித்து, பல்வேறு முறையீடுகளை செய்திருக்கிறோம்.
என்னென்ன தவறுகள் நடைபெற்றிருக்கின்றன என்பதை சான்றுகளோடு
எடுத்துக்காட்டியிருக்கிறோம். இதற்கும் மேலாக நீதிமன்றத்திற்கு செல்லவும்
இருக்கிறோம்.

கேள்வி:- தேர்தலில் பல்வேறு வன்முறை
சம்பவங்கள் நடந்திருந்த போதிலும் பொது மக்களிடமிருந்து எந்த புகாரும்
வரவில்லை என்று மாநில தேர்தல் ஆணையம் சொல்லியிருக்கிறது. எனவே ஆணையம்
நடத்தும் ஆலோசனைக் கூட்டத்தில் நல்ல தீர்வு கிடைக்குமா?

பதில்:- இந்த அரசாங்கத்திடம் நேர்மையான தீர்வுகளை எதிர்பார்க்க முடியாது. அதைப் போல தேர்தல் ஆணைய அய்யரிடமும் எதிர்பார்க்க முடியாது.

கேள்வி:-
கூடங்குளம் பிரச்சினையில் மத்திய அரசு தான் தலையிட வேண்டுமே தவிர, மாநில
அரசு செய்ய முடியாது என்று ஜெயலலிதா பிரதமருக்கு கடிதம் எழுதியிருக்கிறாரே?

பதில்:-
"கடிதம் எழுதினால் போதுமா?'' என்று நான் ஆட்சியிலே இருந்தபோது
கேட்டவர்கள்- இப்போது பிரதமருக்கு கடிதம் எழுதிக் கொண்டிருக்கிறார்கள்;
பாவம்.

கேள்வி:- மத்திய அரசு வேண்டுமென்றே மாநில
அரசு மீது குற்றஞ்சாட்டுவதற்காக, கூடங்குளம் பிரச்சினையை தீர்க்காமல்
இருக்கிறார்கள் என்று சொல்கிறார்களே?

பதில்:- அதில்
உண்மை என்ன என்பதைத் தெரிந்து கொள்ள வேண்டியது பத்திரிகையாளர்களுடைய கடமை.
மாநில அரசைப் பொறுத்தவரையில் "பாம்புக்கு வாலும், மீனுக்குத் தலையும்
காட்டுகின்ற ஜாலவித்தை''யைச் செய்து கொண்டிருக்கிறார்கள்.

கேள்வி:- கூடங்குளம் பிரச்சினையில் தி.மு.க.வின் நிலை என்ன?

பதில்:-
அணு அளவும் மக்களுக்கு எந்தவிதமான ஆபத்தும் உயிர்ச் சேதமும் வராத நிலையில்
அவ்வளவு பாதுகாப்பாக அந்த அணு உலையை அமைப்பதற்கான வழிவகைகளை மத்திய, மாநில
அரசுகள் ஆய்வு செய்து அதன்பிறகு மேற்கொள்ள வேண்டும் என்பதே எமது நிலை.

கேள்வி:- கூடங்குளம் தொடர்பாக பிரதமருக்கு நீங்கள் ஏதாவது ஆலோசனை சொல்கிறீர்களா?

பதில்:- கேட்டால் சொல்வேன்.

கேள்வி:- காவேரி நடுவர் மன்றத்தின் இறுதித் தீர்ப்பை மத்திய அரசின் கெஜட்டில் வெளியிட வேண்டுமென்று சொல்லியிருக்கிறார்களே?

பதில்:-
காவேரிப் பிரச்சினையை இப்போது திடீரென்று கிளப்பியிருப்பதற்குக் காரணமே,
இவர்களுடைய வழக்கிலிருந்து தப்புவதற்கு, இதைக் காரணம் காட்டி மற்றொரு
வாய்தா வாங்க முடியுமா என்பதற்காகத்தான்.

இவ்வாறு அவர் கூறினார்.

மாலை மலர்