வரலாற்றில் இன்று அக்டோபர் 21

by *சம்ஸ் Fri 21 Oct 2011 - 13:36

1493 - Virgin தீவுகளைக் கண்டுபிடித்தார் கொலம்பஸ். கன்னியர் தியாகிகளின் நாளான இன்றைய தினம் அத்தீவு அவர் கண்களில் பட்டதால் அதற்கு 'வர்ஜின் தீவுகள்' என்று அவர் பெயர் சூட்டினார்.

1520 - பேர்டினண்ட் மகெலன் சிலியில் புதிய நீரிணை ஒன்றைக் கண்டுபிடித்தார். இது பின்னர் மகலன் நீரிணை எனப் பெயர்பெற்றது.

1805 - டிரபல்கார் என்ற இடத்தில் பிரித்தானியப் படைகள், பிரெஞ்சு, மற்றும் ஸ்பானியக் கூட்டுப் படைகளின் கடற்படையை வென்றன. இவ்வெற்றி பிரித்தானியக் கடற்படையை 20ம் நூற்றாண்டு வரை இப்பிராந்தியத்தின் பெரும் கடற்படை வல்லரசாக ஆக்கியது.

1824 - ஜோசப் ஆஸ்ப்டின் போர்ட்லண்ட் சிமெந்துக்கான காப்புரிமம் பெற்றார்.

1837 - அமெரிக்கப் பழங்குடித் தலைவன் ஒசியோலா கைது செய்யப்பட்டான்.

1854 - புளோரன்ஸ் நைட்டிங்கேல் மற்றும் 38 தாதிகள் கிரிமியன் போர் முனைக்கு அனுப்பப்பட்டனர்.

1876 - யாழ்ப்பாணத்தில் காலரா நோய் வேகமாகப் பரவியது.

1879 - தொமஸ் எடிசன் தனது முதலாவது தொழில் ரீதியான மின்குமிழைப் பரிசோதித்தார். இது 13 மணி நேரம் எரிந்தது.

1879 - தட்டச்சு இயந்திரத்தில் உங்களால் எவ்வளவு விரைவாக தட்டச்சு செய்ய முடியும்? இன்று நிமிடத்திற்கு 170 சொற்களைத் தட்டச்சு செய்து சாதனை படைத்தார் Margaret Owen என்பவர்.

1892 - உலக கொலம்பியக் கண்காட்சி சிக்காகோவில் அதிகாரபூர்வமாகத் திறக்கப்பட்டது. ஆனாலும், கட்டிட வேலைகள் பூர்த்தியடையாத காரணத்தால் இக்கண்காட்சி 1893, மே 1 ஆம் நாளிலேயே பொதுமக்களின் பார்வைக்குத் திறக்கப்பட்டது.

1895 - ஜப்பானியப் படைகளின் முற்றுகையினால் போர்மோசா குடியரசு வீழ்ந்தது

1944 - இரண்டாம் உலகப் போர்: முதலாவது கமிகசே ஜப்பானிய விமானத் தற்கொலைத் தாக்குதல், அவுஸ்திரேலிய கப்பல் மீது நடத்தப்பட்டது.

1945 - பிரான்சில் முதற்தடவையாக பெண்களுக்கு வாக்குரிமை வழங்கப்பட்டது.

1950 - கம்யூனிஸ்ட் சீனா திபெத்தை ஆக்கிரமித்தது. 15வயது தலாய் லாமாவை அகற்றிவிட்டு 'புத்தரின் மறு அவதாரம்' என பஞ்சன் லாமாவை அறிவித்து அவரை அதிகார பீடத்தில் அமர்த்த எண்ணியது.

1983 - நிறைகளுக்கும் அளவைகளுக்குமான 17வது அனைத்துலகக் கருத்தரங்கில், முழுமையான வெற்றிடத்தில், துல்லியமாக 1/299,792,458 வினாடி நேரத்தில் ஒளி செல்லும் பாதையின் நீளமாக ஒரு மீட்டர் வரையறுக்கப்பட்டது.

2003 - குறுங்கோள் ஏரிசின் படங்கள் எடுக்கப்பட்டன.