பழிதீர்த்தோம் என்று சொல்வதை விரும்பவில்லை - டோனி

by **நேசமுடன் ஹாசிம்** Sat 22 Oct 2011 - 7:50

இங்கிலாந்து அணிக்கு எதிரான ஒருநாள் போட்டித் தொடரை வென்றது மகிழ்ச்சி அளிக்கிறது. எனினும், பழிதீர்த்தோம் என்று சொல்வதை விரும்பவில்லை’ என்று டோனி கூறியுள்ளார்.

இங்கிலாந்துடன் மொகாலியில் நேற்று முன்தினம் நடந்த 3வது ஒருநாள் போட்டியில் அபாரமாக வென்ற இந்தியா 3&0 என்ற கணக்கில் தொடரைக் கைப்பற்றியது. இங்கிலாந்து சென்று விளையாடியபோது டெஸ்ட், ஒருநாள் மற்றும் டி20 தொடரில் பரிதாபமாக தோற்றதற்கு, சொந்த மண்ணில் இந்தியா பழிதீர்த்துக் கொண்டதாக ரசிகர்கள் இந்த வெற்றியைக் கொண்டாடினர்.

இது குறித்து டோனி கூறியதாவது: விளையாட் டில் பழிதீர்ப்பது என்ற வார்த்தைக்கே இடமில்லை. அது மிகக் கடுமையான வார்த்தை. வெற்றி முக்கியம் என்றாலும், திறமையை வெளிப்படுத்துவதுதான் விளையாட்டின் முக்கியமான நோக்கம். ஒரு பக்கம் விளையாட்டு நன்னெறி பற்றி பேசிக் கொண்டே பழிதீர்க்கும் தொடர் என்று வர்ணிப்பது சரியல்ல. ஒருநாள் போட்டிகளில் நமது அணி மீண்டும் சிறப்பாக விளையாடத் தொடங்கி உள்ளது மகிழ்ச்சி அளிக்கிறது. இங்கிலாந்தில் கணிசமாக ரன் குவித்தாலும், தொடர்ச்சியாக டாசில் தோற்று 2வதாக பந்துவீச நேரிட்டது தோல்விக்கு முக்கிய காரணமாக இருந்தது. மழையும், பனிப்பொழிவும் கூட நமக்கு பாதகமாக அமைந்துவிட்டது. ஆனால், இங்குள்ள சூழ்நிலை நமக்கு நன்கு பழக்கப்பட்டது என்பதால் பந்துவீச்சாளர்கள் அதை சாதகமாகப் பயன்படுத்திக் கொண்டுள்ளனர்.

இளம் வீரர்களுக்கு முன் வரிசையில் களமிறங்க வாய்ப்பு அளிப்பது முக்கியம். அவர்கள் அதிக ஓவர்களை எதிர்கொண்டால் தான் தன்னம்பிக்கையுடன் விளையாட முடியும். கிடைத்த வாய்ப்பை அவர்கள் நன்கு பயன்படுத்தி வருகின்றனர். சில வீரர்கள் காயம் காரணமாக அணியில் இடம்பெறவில்லை. அதற்காக அவர்களையே நினைத்துக் கொண்டிருப்பதில் அர்த்தமில்லை. இளம் வீரர்களைத் தயார் செய்வதில் இப்போது கவனம் செலுத்துகிறோம். உணர்ச்சிகளை நான் வெளிப்படுத்துவதில்லை என்கிறார்கள். ஆனால், எப்போதுமே அதை வெளிப்படுத்திக் கொண்டுதான் இருக்கிறேன். அடுத்த போட்டிகளில் மற்ற வீரர்களுக்கும் வாய்ப்பு கொடுப்பது பற்றி ஆலோசித்து முடிவு செய்வோம். இவ்வாறு டோனி கூறியுள்ளார்.