தங்க நகை சேமிப்பு ஏமாற்று திட்டம்

தங்க நகை சேமிப்பு திட்டப்படி, வாடிக்கையாளருக்கு நகை வழங்காத, கேரளா பேஷன் ஜுவல்லரி (கே.எப்.ஜே.,) நிர்வாகம், பாதிக்கப்பட்டவருக்கு நஷ்ட ஈடு வழங்கவும், முறையான அறிவித்தலின்றி இத்திட்டத்தைத் தொடரக் கூடாது எனவும், நுகர்வோர் கோர்ட் உத்தரவிட்டுள்ளது.



சென்னை சூளையைச் சேர்ந்த ஜெய்சங்கர் என்பவர், புரசைவாக்கம் நெடுஞ்சாலையில் இயங்கிவரும் கேரளா பேஷன் ஜுவல்லரியின் மேலாளர், மயிலாப்பூர், லஸ் சர்ச் சாலையில் உள்ள இந்நிறுவனத்தின் நிர்வாக இயக்குனர் ஆகியோருக்கு எதிராக, நுகர்வோர் கோர்ட்டில் தாக்கல் செய்த மனுவில் தெரிவித்துள்ளதாவது: எதிர்மனுதாரர்கள் அளித்த கவர்ச்சிகரமான வாக்குறுதிகளை நம்பி, அவர்களின் மாதாந்திர தங்க நகை சேமிப்புத் திட்டத்தில் சேர்ந்தேன். மாதம் 1,000 ரூபாய் வீதம், 24 மாதங்கள் பணம் செலுத்தினேன். திட்டப்படி, 1,500 ரூபாய் போனஸ் மற்றும் 1,791 ரூபாய் வட்டி அளித்தனர். இவற்றுடன் சேமிப்புத் தொகை 24,000 ரூபாய்க்கு சேர்த்து, நகை வாங்க, புரசைவாக்கத்தில் உள்ள கே.எப்.ஜே., கடைக்குச் சென்றேன். 20 சதவீத சேதாரத் தொகையாக 5,460 ரூபாய் தரும்படி கேட்டனர்.

இத்திட்டத்தில் சேரும்போது, சேதாரத் தொகை 20 சதவீதம் என சொல்லவில்லை. மற்ற தங்க நகைக் கடைகளில், 10 சதவீதம் தான் சேதாரம் பெறப்படுகிறது. திட்டம் நிறைவடைந்த தேதியில், தங்கத்தின் விலை நிலவரப்படி, 10 சதவீத சேதாரத்துடன் தங்க நகைகள் தர வேண்டும். நஷ்ட ஈடாக 50 ஆயிரம் ரூபாய் வழங்க வேண்டும். இவ்வாறு, மனுவில் தெரிவிக்கப்பட்டுள்ளது.

மனுவை விசாரித்த சென்னை (வடக்கு) மாவட்ட நுகர்வோர் கோர்ட் நீதிபதி மோகன்தாஸ், உறுப்பினர் கமலக்கண்ணன் பிறப்பித்துள்ள உத்தரவு: சம்பந்தப்பட்ட தங்க நகை விற்பனை நிறுவனம், தங்க நகை சேமிப்பு திட்டத்தில், மனுதாரருக்கு சேர வேண்டிய 27 ஆயிரத்து 291 ரூபாய்க்கு, 2010 செப்டம்பர் 8ம் தேதியில் தங்க விலை நிலவரப்படி, நகைகள் வழங்க வேண்டும் அல்லது அத்தொகையை 9 சதவீத வட்டியுடன் திரும்பத் தர வேண்டும். நஷ்ட ஈடாக 25 ஆயிரம் ரூபாயும், வழக்கு செலவாக 5,000 ரூபாயும் வழங்க வேண்டும். மேலும், சரியான சேதார விவரத்தை, வாடிக்கையாளர்களுக்கு எழுத்துப்பூர்வமாகத் தெரிவிக்கும் வரை, இத்திட்டத்தைச் செயல்படுத்தக் கூடாது.