சிறையில் தீபாவளி கொண்டாடும் எடியூரப்பா

கர்நாடக முன்னாள் முதல்- மந்திரி எடியூரப்பா மீது நில ஒதுக்கீடு
செய்ததில் ஊழல் செய்ததாக 5 வழக்குகள் தொடரப்பட்டன. இந்த வழக்குகளில்
கைதாவதை தவிர்க்க எடியூரப்பா லோக் ஆயுக்தா கோர்ட்டில் முன்ஜாமீன் கேட்டார்.
ஆனால் கோர்ட்டு அவரது மனுவை தள்ளுபடி செய்தது. இதையடுத்து எடி யூரப்பா
கோர்ட்டில் சரண் அடைந்தார். ஜெயிலில் அடைக்கப்பட்ட அவருக்கு மூச்சுத்
திணறல் ஏற்பட்டதால் மருத்துவமனையில் அனுமதிக்கப்பட்டார்.

பிறகு
பெங்களூர் புறநகர் பகுதியில் பார்ப்பனா அக்ரகாரம் என்ற இடத்தில் உள்ள
மத்திய சிறையில் அவர் அடைக்கப்பட்டார். நவம்பர் 3-ந்தேதி வரை அவர் காவலில்
இருக்க கோர்ட்டு உத்தரவிட்டுள்ளது. இதற்கிடையே எடியூரப்பா ஜாமீன் கோரி மனு
செய்தார். கர்நாடக ஐகோர்ட்டில் அந்த மனு மீதான விசாரணை நடந்தது. பிறகு
தீர்ப்பு 28-ந்தேதிக்கு ஒத்திவைக்கப்பட்டது.

தீபாவளிக்கு
முன்னதாக விடுதலையாகி வீட்டுக்கு சென்றுவிடலாம் என்று எடியூரப்பா
நம்பிக்கையுடன் இருந்தார். ஆனால் ஐகோர்ட்டு ஜாமீன் கொடுக்காததால் அவர்
ஏமாற்றம் அடைந்தார். தீபாவளி தினத்தன்று அவர் மத்திய சிறையில் இருக்க
வேண்டிய நிலை ஏற்பட்டுள்ளது. வழக்கமாக தீபாவளி தினத்தன்று எடியூரப்பா
புத்தாடை அணிந்து, எல்லோருக்கும் இனிப்புகள் வழங்கி தீபாவளியை மிகவும்
உற்சாகமாகக் கொண்டாடுவார். இந்த தடவை ஜெயில் விதிகளுக்கு ஏற்ப அவர்
தீபாவளியை கொண்டாடுவார் என்று அவரது குடும்பத்தினர் கூறினார்கள்.