தமிழ்த் தேசியக் கூட்டமைப்பினரின் அமெரிக்க இராஜாங்கத் திணைக்களத்துடனான பேச்சுவார்த்தை ஆரம்பமானது.

by **முனாஸ் சுலைமான்** Thu 27 Oct 2011 - 4:16

அமெரிக்காவை வந்தடைந்த தமிழ்த் தேசியக் கூட்டமைப்பினர் இராஜாங்கத் திணைக்களத்துடனான பேச்சுக்களை இன்று காலை 9.30 மணிக்கு ஆரம்பித்தனர்.
தமிழ்த் தேசியக் கூட்டமைப்பைச் சேர்ந்த திரு. இரா. சம்பந்தன், மாவை. சேனாதிராஜா, எம்.ஏ. சுமந்திரன் மற்றும் சுரேஸ் பிரேமசந்திரன் ஆகியோர் நேற்று அதிகாலை 6 மணிக்கு இலங்கையிலிருந்து புறப்பட்டு அமெரிக்க நேரம் நள்ளிரவு 12.30 மணிக்கு வாசிங்டனை வந்தடைந்தனர்.

அமெரிக்க இராஜாங்கத் திணைக்களத்திற்கு இன்று காலை 9.20 மணியளவில் சென்றடைந்த அவர்கள் நால்வரும் அதிகாரிகளால் வரவேற்கப்பட்டு சரியாக காலை 9.30 மணிக்கு பேச்சுவார்த்தைகளிற்காக அழைத்துச் செல்லப்பட்டனர்.

தமிழர்களின் ஜனநாயகத் தலைமையுடன் பேச்சுக்களை அமெரிக்கா மேற்கொள்வது குறித்து சிறீலங்கா இராஜதந்திர ரீதியில் கடும் கண்டனத்தை வெளியிட்ட போதும் அமெரிக்கா அதனை கருத்திற் கொள்ளாததோடு இலங்கைத் தமிழர்களிற்குரிய பிரச்சினைகளிற்கு தீர்வு காணப்பட வேண்டும் என்ற தனது நிலைப்பாட்டை வலியுறுத்தம் வகையிலேயே தமிழ்த் தேசியக் கூட்டமைப்பை அமெரிக்காவிற்கு அழைத்திருந்தது.